മുട്ടുകുത്തി ഇന്ത്യയുടെ മണ്ണിൽ ചുംബിച്ച്​ പാകിസ്​താൻ വിട്ടയച്ച 20 മത്സ്യത്തൊഴിലാളികൾ

അട്ടാരി: ജന്മനാട്ടിൽ തിരി​െച്ചത്തിയതിന്‍റെ അത്യാഹ്ലാദത്തിൽ എന്തുചെയ്യണ​െമന്നറിയാത്ത അവസ്​ഥയിലായിരുന്ന​ു അവർ 20 പേർ. രാജ്യത്തിന്‍റെ സമുദ്രാതിർത്തി ലംഘിച്ചെന്നാരോപിച്ച് അറസ്റ്റ് ചെയ്ത 20 ഇന്ത്യൻ മത്സ്യത്തൊഴിലാളികളെയാണ്​ തിങ്കളാഴ്ച പാകിസ്​താൻ വിട്ടയച്ചത്​. പാകിസ്​താൻ ആസ്​ഥാനമായ ഈദി ഫൗണ്ടേഷന്‍റെ നിയമസഹായത്തോടെയാണ്​ മോചനം സാധ്യമായത്​. നാലുവർഷമായി ജയിലിൽ കഴിയുന്നവരും കൂട്ടത്തിലുണ്ടായിരുന്നു.

തിങ്കളാഴ്ച വൈകുന്നേരത്തോടെ കരമാർഗം​ അട്ടാരി അതിർത്തിയിലൂടെയാണ്​ ഇവരെ ഇന്ത്യയിലേക്ക് കൊണ്ടുവന്നതെന്ന് അട്ടാരി അതിർത്തിയിലെ ഉദ്യോഗസ്ഥർ പറഞ്ഞു. അതിർത്തി​യിലേക്ക്​ കാലെടുത്തു വെച്ച നിമിഷം അവർ മുട്ടുകുത്തി ഇന്ത്യൻ മണ്ണിൽ ചുംബിച്ചു. അമൃത്​സറിൽ ഒരു രാത്രി തങ്ങിയ ശേഷം ചൊവ്വാഴ്ച ഗുജറാത്തിലെ സ്വന്തം നാട്ടിലേക്ക് മടങ്ങും. എല്ലാവരെയും കോവിഡ് പരിശോധന ഉൾപ്പെടെ വിശദമായ വൈദ്യപരിശോധനയ്ക്ക് വിധേയമാക്കിയതായി അധികൃതർ അറിയിച്ചു.

അറബിക്കടലിലെ സമുദ്രാതിർത്തിയിലൂടെ ബോട്ടുകൾ പാകിസ്​താനിലേക്ക് പ്രവേശിച്ചതിനാണ്​ ഇവർ പിടിയിലായത്. കറാച്ചി മാലിറിലെ ലാന്ധി ജില്ലാ ജയിലിലായിരുന്നു ഇവരെ പാർപ്പിച്ചിരുന്നത്​. ഇവിടെ നിന്ന്​ ഈദി ഫൗണ്ടേഷന്‍റെ നേതൃത്വത്തിൽ റോഡ് മാർഗം ലാഹോറിലേക്ക് പോയി. നാട്ടിലേക്ക് മടങ്ങാൻ സഹായിച്ച ഈദി ഫൗണ്ടേഷനോട് മത്സ്യത്തൊഴിലാളികൾ നന്ദി പറഞ്ഞു. ഇസ്​ലാമാബാദിലെ ഇന്ത്യൻ ഹൈക്കമ്മീഷൻ നൽകിയ 'എമർജൻസി ട്രാവൽ സർട്ടിഫിക്കറ്റിന്റെ' അടിസ്ഥാനത്തിലാണ് ഇവർ ഇന്ത്യയിൽ പ്രവേശിച്ചത്.

സമുദ്രാതിർത്തി ലംഘിച്ചതിന് പാകിസ്​താനും ഇന്ത്യയും എതിർ രാജ്യങ്ങളിലെ മത്സ്യത്തൊഴിലാളികളെ അറസ്റ്റ് ചെയ്യുന്നത്​ പതിവാണ്​. ഈ വർഷം തുടക്കത്തിൽ ഇന്ത്യയും പാകിസ്​താനും പരസ്പരം കൈമാറ്റം ചെയ്ത തടവുകാരുടെ പട്ടിക പ്രകാരം 51 സാധാരണക്കാരും 577 മത്സ്യത്തൊഴിലാളികളും ഉൾപ്പെടെ 628 ഇന്ത്യക്കാരാണ്​ പാകിസ്​താനിൽ തടവിലായത്. 282 സാധാരണക്കാരും 73 മത്സ്യത്തൊഴിലാളികളും ഉൾപ്പെടെ 355 പാകിസ്​താൻകാർ ഇന്ത്യയിലും തടവിൽ കഴിയുന്നുണ്ട്​.