സ്​പുട്​നിക്​ വാക്​സിൻ: പനസിയ ബയോടെക്കിന്​ ഡി.സി.ജി.ഐ ലൈസൻസ്; പ്രതിവർഷം 100 മില്യൺ ഡോസ്​ ഉൽപാദിപ്പിക്കും​

ന്യൂഡൽഹി: റഷ്യയുടെ കോവിഡ്​ വാക്​സിനായ സ്​പുട്​നിക്​ V ഇന്ത്യയിൽ ഉൽപാദിപ്പിക്കുന്നതിന്​ പ്രമുഖ ഫാർമ കമ്പനിയായ പനസിയ ബയോടെക്കിന്​ ദി ഡ്രഗ്​സ്​ കൺട്രോളർ ജനറൽ ഓഫ്​ ഇന്ത്യയുടെ (ഡി.സി.ജി.ഐ) ലൈസൻസ്​. സ്​പുട്​നിക്​ വാക്​സിൻ പ്രാദേശികമായി ഉൽപാദിപ്പിക്കാൻ ലൈസൻസ്​ ലഭിക്കുന്ന ആദ്യ കമ്പനിയാണ്​ പനസിയ. വാക്സിന്‍റെ അന്താരാഷ്​ട്ര ഉത്പാദനത്തിന്‍റെയും വിതരണത്തിന്‍റെയും ചുമതലയുള്ള റഷ്യൻ ഡയറക്ട് ഇൻവെസ്റ്റ്മെന്‍റ്​ ഫണ്ടുമായി (ആർ.ഡി.ഐ.എഫ്​) സ്​പുട്​നിക്​ ഉൽപാദനത്തിൽ പങ്കാളിയായ ആറ്​ കമ്പനികളിൽ ഒന്ന്​ പനസിയ ബയോടെക്​ ആണ്​.

പനസിയയുടെ ഹിമാചൽപ്രദേശിലെ ബഡ്​ഡിയിലുള്ള നിർമാണശാലയിലുണ്ടാക്കിയ സ്​പുട്​നിക് വാക്​സിന്‍റെ ആദ്യബാച്ച്​ ഇൗ വർഷം മേയ്​ അവസാനവാരം റഷ്യയിലെ ഗമലേയ സെന്‍ററിന്​ അയച്ചുകൊടുത്തിരുന്നു. ഗമലേയ സെന്‍ററിലെ എല്ലാ ഗുണനിലവാര പരിശോധനകളും വിജയകരമായി പിന്നിട്ട വാക്​സിൻ ഹിമാചൽ പ്രദേശിലെ കസോളിയിലുള്ള സെൻട്രൽ ഡ്രഗ്​ ലബോറട്ടറിയിലെ പരിശോധനകളും വിജയിച്ചിരുന്നു. ഈ പരീക്ഷണ വിജയങ്ങളും ഇപ്പോൾ ലഭിച്ച ഡി.സി.ജി.ഐ ലൈസൻസും കമ്പനിക്ക്​ ലഭിച്ച മികച്ച അംഗീകാരമാണെന്ന് പനസിയ ബയോടെക്​ മാനേജിങ്​ ഡയറക്​ടർ രാജേഷ്​ ​െജയ്​ൻ പറഞ്ഞു.

പ്രതിവർഷം 100 മില്യൺ ഡോസുകൾ ഉൽപാദിപ്പിക്കാനാണ്​ ആർ.ഡി.ഐ.എഫ​ുമായി ധാരണയായിരിക്കുന്നതെന്ന്​ പനസിയ വൃത്തങ്ങൾ അറിയിച്ചു. ​സ്​പുട്​നിക്​ വാക്​സിന്‍റെ വിതരണത്തിന്​ ആർ.ഡി.ഐ.എഫുമായി ധാരണയുണ്ടാക്കിയിരിക്കുന്ന ഡോ.​ റെഡ്​ഡീസ്​ ലബോറട്ടറി വഴിയായിരിക്കും പനസിയ ഉൽപാദിപ്പിക്കുന്ന വാക്​സിനും വിതരണം ചെയ്യുക. 250 മില്യൺ ഡോസുകൾ വിതരണം ചെയ്യുന്നതിനാണ്​ ഡോ. റെഡ്​ഡീസ്​ ലബോറട്ടറിയും ആർ.ഡി.ഐ.എഫ​ും ധാരണയായിരിക്കുന്നത്​.

ഏപ്രിൽ 12നാണ് സ്പുട്നിക് Vക്ക് ഇന്ത്യ അടിയന്തര ഉപയോഗ അനുമതി നൽകിയത്. മേയ്​ 14 മുതൽ ഈ വാക്സിൻ ഇന്ത്യയിൽ ഉപയോഗിച്ചുതുടങ്ങിയിട്ടുമുണ്ട്​. വിശാഖപട്ടണം, ബംഗളൂരു, മുംബൈ, കൊൽക്കത്ത, ഡൽഹി, ബഡ്​ഡി, ചെന്നൈ തുടങ്ങിയ സ്​ഥലങ്ങളിൽ സ്​പുട്​നിക്​ വാക്​സിൻ നൽകുന്നുണ്ട്​. 67 രാജ്യങ്ങളാണ്​ സ്​പുട്​നിക്​ വാക്​സിൻ ഉപയോഗത്തിന്​ അനുമതി നൽകിയിരിക്കുന്നത്​. രണ്ട്​ ഡോസ്​ സ്​പുട്​നിക്​ വാക്​സിൻ എടുക്കുന്നത്​ കോവിഡ്​ പ്രതിരോധത്തിൽ 91.6 ശതമാനം വിജയകരമാണെന്നാണ്​ ഗമലേയ സെന്‍റർ അവകാശപ്പെടുന്നത്​.