ഡൽഹിയിൽ വീട്ടിൽ കഴിയുന്ന രോഗികൾക്ക് ഇനി​ ഓക്​സിജൻ ഓ​ൺലൈനിൽ ഓർഡർ ചെയ്യാം

ന്യൂഡൽഹി: കോവിഡ്​ ബാധിച്ച്​ വീട്ടിൽ കഴിയുന്ന രോഗികൾക്ക്​് ഒാക്​സിജൻ ലഭ്യമാക്കാൻ ഒാൺലൈൻ സൗകര്യവുമായി ഡൽഹി സർക്കാർ. സിലിണ്ടറുകളുടെ സുഗമമായ ലഭ്യത ഉറപ്പുവരുത്താനുള്ള ഇൗ സംവിധാനം നടപ്പാക്കാൻ വിവിധ ജില്ലാ അധികാരികളെ ചുമതലപ്പെടുത്തി.

ഓക്സിജൻ ആവശ്യമുള്ളവർ https://delhi.gov.in എന്ന പോർട്ടലിൽ രജിസ്റ്റർ ചെയ്യണം. അപേക്ഷയോടൊപ്പം ആധാർ, കോവിഡ് ടെസ്റ്റ് റിപ്പോർട്ടി​െൻറ പകർപ്പുകൾ, സി.ടി-സ്കാൻ റിപ്പോർട്ട് എന്നിവയിൽ ഏതെങ്കിലും സമർപ്പിക്കണം.

നിലവിൽ റീഫിൽ സെൻററുകളിലും ഡിപ്പോകളിലും ഒാക്​സിജന്​ വേണ്ടി ജനങ്ങൾ മണിക്കൂറുകളോളം കാത്തുനിൽക്കുകയാണ്​. ഇതിന്​ പരിഹാരം കാണുകയാണ്​ പുതിയ സംവിധാനത്തി​െൻറ ലക്ഷ്യം.

ഒാക്​സിജനായുള്ള ഒാൺലൈൻ അപേക്ഷകൾ സ്വീകരിക്കാൻ മതിയായ ഉദ്യോഗസ്ഥരെ നിയമിക്കാനും യോഗ്യതയുള്ളവർക്ക് മുൻ‌ഗണനയോടെ ഇ-പാസ് ലഭിക്കുന്നുണ്ടെന്ന് ഉറപ്പാക്കാനും എല്ലാ ജില്ലാ അധികാരികളോടും സർക്കാർ ആവശ്യപ്പെട്ടിട്ടുണ്ട്. അപേക്ഷ അംഗീകരിച്ചവർക്ക് എപ്പോൾ, എവിടെ, ഏത് സമയത്ത്, ഏത് ഡിപ്പോയിൽ ഓക്സിജൻ സിലിണ്ടറുകൾ ലഭിക്കുമെന്ന് വ്യക്തമാക്കുന്ന ഇ-പാസ് ജില്ലാ മജിസ്‌ട്രേറ്റിൽനിന്ന് ലഭിക്കും. വ്യാഴാഴ്​ച മുതൽ ഓൺലൈൻ ബുക്കിംഗ് സൗകര്യം ആരംഭിച്ചു.

കഴിഞ്ഞ 24 മണിക്കൂറിനുള്ളിൽ 21,000 പുതിയ കോവിഡ് കേസുകളും 311 മരണങ്ങളും ഡൽഹിയിൽ റിപ്പോർട്ട് ചെയ്​തിട്ടുണ്ട്​. ഇതിൽ പലരും ഓക്സിജ​െൻറ അഭാവം മൂലമാണ്​ മരിച്ചത്​.