യു.എസിനെക്കുറിച്ച്​ ആശങ്കപ്പെടുന്നവർ കൊടും​ശൈത്യത്തിൽ റോഡിലിറങ്ങിയ കർഷകരെക്കുറിച്ചു​ം ഓർക്കൂ -വിജേന്ദർ സിങ്​

ന്യൂഡൽഹി: അമേരിക്കയെക്കുറിച്ചോർത്ത്​ ആശങ്ക​െപ്പടുന്നവർ രാജ്യത്തെ റോഡുകളിൽ കൊടുംശൈത്യത്തിൽ പ്രതിഷേധിക്കുന്നവരെക്കുറിച്ചോർത്തും ആശങ്കപ്പെടണമെന്ന്​ ബോക്​സിങ്​ താരം വിജേന്ദർ സിങ്​.

'അവിടെ​െയന്താണ്​ സംഭവിക്കുന്നതെന്നോർത്ത്​, ആളുകൾക്ക്​ അമേരിക്കയെക്കുറിച്ച്​ ആശങ്കയുണ്ട്​. നമ്മുടെ കർഷകർ കൊടും ശൈത്യത്തിൽ റോഡുകളിലാണ്​. അവരെക്കു​റിച്ചോർത്തും ആശങ്കപ്പെടുക' -വിജേന്ദർ സിങ്​ ട്വിറ്ററിൽ കുറിച്ചു.

യു.എസ്​ പ്രസിഡന്‍റ്​ ഡോണൾഡ്​ ട്രംപ്​ അനുകൂലികൾ യു.എസ്​ പാർലമെന്‍റിൽ അതിക്രമിച്ചുകയറിയ സംഭവത്തിൽ അപലപിച്ച്​ പ്രധാനമന്ത്രി നരേന്ദ്രമോദി രംഗ​ത്തെത്തിയതിന്​ പിന്നാലെയായിരുന്നു പ്രതികരണം. ചിട്ടയോടെയും സമാധാനപരമായും അധികാര കൈമാറ്റം തുടരണം. അക്രമ മാർഗങ്ങളിലൂടെ ജനാധിപത്യ പ്രക്രിയയെ അട്ടിമറിക്കുന്നത്​ അനുവദിക്കാനാകില്ലെന്നായിരുന്നു മോദിയ​ുടെ ട്വീറ്റ്​. മോദിയുടെ പ്രതികരണത്തെ പരിഹസിച്ച്​ മുതിർന്ന അഭിഭാഷകൻ പ്രശാന്ത്​ ഭൂഷൺ അടക്കമുള്ളവർ രംഗത്തെത്തിയിരുന്നു.

കേന്ദ്രസർക്കാറിന്‍റെ കാർഷിക നിയമങ്ങൾക്കെതിരായ പ്രക്ഷോഭത്തിൽ വിജേന്ദർ സിങ്ങും അണിചേർന്നിരുന്നു. കരിനിയമങ്ങൾ പിൻവലിച്ചില്ലെങ്കിൽ തനിക്ക്​ ലഭിച്ച പരമോന്നത കായിക പുരസ്​കാരമായ രാജീവ്​ ഗാന്ധി ഖേൽ രത്​ന തിരിച്ചുനൽകു​െമന്നും അദ്ദേഹം പ്രഖ്യാപിച്ചിരുന്നു.

അതേസമയം കാർഷകരും കേന്ദ്രസർക്കാറുമായി നടത്തിയ എട്ടാംവട്ട ചർച്ചയും പരാജയപ്പെട്ടു​. കാർഷിക നിയമങ്ങൾ പിൻവലിക്കാൻ തയാറല്ലെന്ന്​ കേന്ദ്രം വ്യക്തമാക്കിയ​േതാടെയാണ്​ ചർച്ച പരാജയപ്പെട്ടത്​.