മുഴുവൻ ആരാധനാലയങ്ങളിലും സ്​ത്രീപ്രവേശനം അനുവദിക്കണമെന്ന്​ ഡൽഹി ​ൈഹകോടതിയിൽ ഹരജി

ന്യൂഡൽഹി: ശബരിമല ക്ഷേത്രത്തിൽ എല്ലാ പ്രായത്തിലുമുള്ള സ്​ത്രീകൾക്കും​ പ്രവേശനം അനുവദിച്ചുകൊണ്ടുള്ള സുപ്രീംകോടതിയുടെ ചരിത്രവിധിയെ പിൻപറ്റി രാജ്യത്തെ മുഴുവൻ ആരാധനാലയങ്ങളിലും ആർത്തവ സമയത്തും അല്ലാത്തപ്പോഴും സ്​ത്രീ പ്രവേശനം അനുവദിക്കണമെന്നാവശ്യപ്പെട്ട്​ ഡൽഹി ഹൈകോടതിയിൽ പൊതു താത്​പര്യ ഹരജി.

ആറ്റുകാൽ, ചക്കുളത്ത് കാവ്​, അസാമിലെ കാമാഖ്യ തുടങ്ങിയ ക്ഷേത്രങ്ങളിൽ പുരുഷൻമാരെ പ്രവേശിപ്പിക്കണമെന്നും ഹരജിയിൽ ആവശ്യമുന്നയിച്ചിട്ടുണ്ട്​. ഉത്തർ പ്രദേശിലെ നോയിഡ സ്വദേശി സഞ്​ജീവ്​ കുമാർ ആണ് പത്തോളം ആവശ്യങ്ങളുന്നയിച്ച്​​ ഹരജി നൽകിയത്​.

പുരുഷൻമാർക്ക്​ മാത്രം പ്രവേശനമുള്ള ക്ഷേത്രങ്ങളിൽ ആർത്തവ സമയത്തും അല്ലാത്തപ്പോഴും സ്​ത്രീ പ്രവേശനവും സ്​ത്രീകൾക്ക്​ മാത്രം പ്രവേശനമുള്ള ക്ഷേത്രങ്ങളിൽ പുരുഷ പ്രവേശനവും വേണം, ആർത്തവകാലത്ത് മുസ്‌ലീം സ്ത്രീകളെ പള്ളികളിലും ഹിന്ദു സ്ത്രീകളെ അടുക്കളയിലും കയറാൻ അനുവദിക്കണം, സ്​ത്രീകൾക്ക്​ എല്ലായിടത്തും പ്രാർത്ഥിക്കാനും ആർത്തവകാലത്ത്​ മുസ്‌ലീം സ്ത്രീകൾക്ക്​ നോമ്പ് നോൽക്കാനും അനുമതി നൽകണം എന്നീ ആവശ്യങ്ങളും ഹരജിയിൽ മുന്നോട്ടു വെക്കുന്നുണ്ട്​.

മുസ്‌ലീം സ്ത്രീകളെ ഇമാം ആകാനും വെള്ളിയാഴ്ച പ്രാർത്ഥനകളിൽ പങ്കെടുക്കാനും അനുവദിക്കണം, ഹിന്ദു സ്ത്രീകളെ പൂജാരികളും പുരോഹിതരും ആകാനും ക്രിസ്ത്യൻ സ്ത്രീകളെ പുരോഹിതരും ബിഷപ്പും ആകാനും അനുവദിക്കണം, എല്ലാ മതത്തിലുമുള്ള സ്ത്രീകൾക്കും സോരാഷ്ട്രീയൻ ക്ഷേത്രങ്ങളിൽ പ്രവേശിക്കാൻ അനുമതി നൽകണം എന്നിവയാണ് ഹരജിയിലെ​ മറ്റ്​ ആവശ്യങ്ങൾ.