എല്ലാവർക്കും ഡിജിറ്റൽ ആരോഗ്യ ഐ.ഡി​; ആയുഷ്​മാൻ ഭാരത്​ ഡിജിറ്റൽ മിഷൻ പദ്ധതി പ്രധാനമന്ത്രി ഉദ്​ഘാടനം ചെയ്​തു

ന്യൂഡൽഹി: രാജ്യത്ത്​ ആയുഷ്​മാൻ ഭാരത്​ ഡിജിറ്റൽ മിഷൻ പദ്ധതി പ്രധാനമന്ത്രി നരേന്ദ്രമോദി ഉദ്​ഘാടനം ചെയ്​തു. എല്ലാ ഇന്ത്യക്കാരനും പ്രത്യേക ഡിജിറ്റൽ ആരോഗ്യ തിരിച്ചറിയൽ കാർഡ്​ നൽകുന്നതാണ്​ പദ്ധതി.

ആയുഷ്​മാൻ ഭാരത്​ പ്രധാനമന്ത്രി ജൻ ആരോഗ്യ യോജനയുടെ മൂന്നാം വാർഷികം ആഘോഷിക്കുന്നതിന്‍റെ ഭാഗമായാണ്​ ദേശീയതലത്തിൽ ആയുഷ്​മാൻ ഭാരത്​ ഡിജിറ്റൽ മിഷന്​ തുടക്കം കുറിക്കുന്നത്​. 2020 ആഗസ്റ്റ്​ 15ന്​ ആയുഷ്​മാൻ ഭാരത്​ ഡിജിറ്റൽ മിഷന്‍റെ പൈലറ്റ്​ പദ്ധതി പ്രധാനമന്ത്രി പ്രഖ്യാപിച്ചിരുന്നു.

ആയുഷ്​മാൻ ഭാരത്​ ഡിജിറ്റൽ മിഷൻ പദ്ധതി

പദ്ധതിയിലൂടെ ഓരോ പൗരനും ഒരു ആരോഗ്യ ഐ.ഡി നൽകും. അത്​ അവരുടെ ആരോഗ്യവിവരങ്ങൾ അടങ്ങിയ അക്കൗണ്ടായിരിക്കും. ഇതിലേക്ക്​ വ്യക്തിഗത, ആരോഗ്യ രേഖകൾ ബന്ധിപ്പിക്കും. ഇത്​ മൊബൈൽ ആപ്ലിക്കേഷന്‍റെ സഹായത്തോടെ കാണാനാകുമെന്ന്​ കേന്ദ്രസർക്കാർ പറയുന്നു.

ഹെൽത്ത്​ കെയർ പ്രഫഷനൽസ്​ രജിസ്​ട്രി, ഹെൽത്ത്​ കെയർ ഫെസിലിറ്റീസ്​ രജിസ്​ട്രി എന്നിവ ഇതിന്‍റെ ഭാഗമാകും. എല്ലാ ആരോഗ്യസേവന കേന്ദ്രങ്ങളിലും ഇവ ലഭ്യമാകുകയും ഡോക്​ടർമാർ/ ആശുപത്രികൾ, ആരോഗ്യ പരിപാലന സേവന ദാതാക്കൾ തുടങ്ങിയവ ഇതിന്‍റെ ഭാഗമാകുകയും ചെയ്യും.

രാജ്യത്തെ ​ജനങ്ങൾക്ക്​ വളരെ എളുപ്പത്തിൽ ആരോഗ്യരംഗത്തെ സേവനങ്ങൾ ലഭിക്കാൻ സഹായിക്കുകയാണ്​ ലക്ഷ്യം.

14 അക്ക തിരിച്ചറിയൽ നമ്പറാണ്​ ഡിജിറ്റൽ ആരോഗ്യ ​െഎ.ഡിയായി പ്രവർത്തിക്കുക. ഇതിലേക്ക്​ ആശുപത്രിയിൽ എത്തുന്നതിന്‍റെയും പരിശോധനകൾ നടത്ത​ുന്നതിന്‍റെയും ​വിവരങ്ങളും പരിശോധന ഫലങ്ങളും ഡോക്​ടറുടെ നിഗമനങ്ങളും കൂട്ടിച്ചേർക്കും. വ്യക്തികൾക്കും ആരോഗ്യകേന്ദ്രങ്ങൾക്കും ഒര​ുപോലെ ഇവ ഉപയോഗിക്കാനാകും. കൂടാതെ എളുപ്പത്തിൽ ഒരു വ്യക്തിയുടെ ആരോഗ്യവിവരങ്ങൾ ലഭ്യമാകും. അതേസമയം ആധാറുമായി ഇവ ബന്ധിപ്പിക്കൽ നിർബന്ധമല്ലെന്നാണ്​ കേന്ദ്രസർക്കാറിന്‍റെ നിലവിലെ അറിയിപ്പ്​.

ജൻധൻ, ആ​ധാർ, മൊബൈൽ, സർക്കാറിന്‍റെ മറ്റ്​ ഡിജിറ്റൽ സംരംഭങ്ങൾ എന്നിവയുടെ അടിസ്​ഥാനത്തിൽ ആയുഷ്​മാൻ ഭാരത്​ ഡിജിറ്റൽ മിഷൻ ഡേറ്റയും വിവരങ്ങളും നൽകിയാണ്​ ഓൺലൈൻ പ്ലാറ്റ്​ഫോം സൃഷ്​ടിക്കുക. അടിസ്​ഥാന സൗകര്യ സേവനങ്ങൾ, ഓപ്പൺ, സ്റ്റാൻഡേന്‍ഡ്​ അധിഷ്​ഠിത ഡിജിറ്റൽ സംവിധാനങ്ങൾ ഇതിനായി പ്രയോജനപ്പെടുത്തും. കൂടാതെ വ്യക്തിഗത വിവരങ്ങളുടെ സുരക്ഷ, രഹസ്യസ്വഭാവം, സ്വകാര്യത തുടങ്ങിയ സംരക്ഷിക്കുമെന്നും പറയുന്നു. പൗരന്മാരുടെ രേഖാമൂലമുള്ള ആരോഗ്യ രേഖകൾ അവരുടെ സമ്മ​തത്തോടെ കൈമാറ്റം ചെയ്യാനും പ്രാപ്യമാക്കാനും മിഷൻ സഹായിക്കുമെന്നും കേന്ദ്രം പറയുന്നു.