പാർലമെൻറ്​ സ്​തംഭനം: മോദി 12ന്​ നിരാഹാരമിരിക്കും

ന്യൂഡൽഹി: പ്രതിപക്ഷ പാർട്ടികൾ തുടർച്ചയായ പാർലമ​​െൻറ്​ സ്​തംഭപ്പിക്കുന്നതിൽ പ്രതിഷേധിച്ച്​  പ്രധാനമ​ന്ത്രി നരേ​ന്ദ്രമോദി ഏപ്രിൽ 12ന്​ നിരാഹാരമിരിക്കും. ബി.ജെ.പി അധ്യക്ഷൻ അമിത്​ ഷാ വിഷയത്തിൽ പ്രതിഷേധിച്ച്​ കർണാടകയിലെ ഹൂബ്ലിയിലും നിരാഹാരമിരിക്കുന്നുണ്ട്​. രാജ്യത്തുടനീളം ബി.ജെ.പി എം.പിമാർ മോദിയുടെ സമരത്തിന്​ പിന്തുണ പ്രഖ്യാപിച്ച്​ നിരാഹാരമിരിക്കുമെന്നാണ്​ റിപ്പോർട്ട്​. രാജ്​ഘട്ടിൽ കഴിഞ്ഞ ദിവസം കോൺഗ്രസി​​​െൻറ സമരത്തിന്​ പിന്നാലെയാണ്​ ബി.ജെ.പിയും സമരത്തിനിറങ്ങുന്നത്​. 

അതേ സമയം, ദൈനംദിന പ്രവർത്തനങ്ങൾ മോദി ഒഴിവാക്കില്ലെന്നാണ്​ സൂചന. ഉദ്യോഗസ്ഥരമായുള്ള കൂടികാഴ്​ചകളും, ഫയൽ നോക്കലുമെല്ലാം അദ്ദേഹം ഒാഫീസിലെത്തി നിർവഹിക്കുമെന്നാണ്​ റിപ്പോർട്ടുകൾ. പാർലമ​​െൻറ്​ സ്​തംഭനത്തിൽ പ്രതിഷേധിച്ച്​ നിരാഹാരമിരിക്കാമെന്ന ആശയം മോദി തന്നെയാണ്​ മുന്നോട്ട്​ വെച്ചതെന്ന്​ ബി.ജെ.പി വക്​താവ്​ ജി.വി.എൽ നരസിംഹറാവു പറഞ്ഞു. തുടർച്ചയായുണ്ടാവുന്ന പാർലമ​​െൻറ്​ സ്​തംഭനത്തിൽ പ്രതിഷേധിച്ചാണ്​ ബി.ജെ.പി എം.പിമാർ 23 ദിവസത്തെ ശമ്പളം ഉപക്ഷേിക്കാൻ തീരുമാനിച്ചതെന്നും അദ്ദേഹം വ്യക്​തമാക്കി. 

പാർലമ​​െൻറ്​ സ്​തംഭനത്തിൽ മോദിയെയും ബി.ജെ.പിയേയും കുറ്റപ്പെടുത്തി കോൺഗ്രസ്​ അധ്യക്ഷൻ രാഹുൽ ഗാന്ധി രംഗത്തെത്തിയതിന്​ പിന്നാലെയാണ്​ പുതിയ നീക്കം. പാർലമ​​െൻറിലെ പ്രതിഷേധം മൂലം ദലിതർക്കെതിരായ അതിക്രമങ്ങൾ ഉൾപ്പടെയുള്ള വിഷയങ്ങൾ ചർച്ച ചെയ്യാൻ കഴിയാതിരുന്നതാണ്​ രാഹുലിനെ പ്രകോപിപ്പിച്ചത്​.