പഴയ വാഹനങ്ങൾ പൊളിക്കുന്നതിന്​ പുതിയ നയം പ്രഖ്യാപിച്ച്​ നരേന്ദ്ര മോദി

ന്യൂഡൽഹി: പഴയ വാഹനങ്ങൾ പൊളിക്കുന്നതിന്​ പുതിയ നയം പ്രഖ്യാപിച്ച്​ പ്രധാനമന്ത്രി നരേന്ദ്ര മോദി. മാലിന്യത്തിൽ നിന്ന്​ സമ്പത്ത്​ എന്നതാണ്​ പുതിയ നയമെന്ന്​ പ്രധാനമന്ത്രി പറഞ്ഞു. വികസന യാത്രയിലെ നിർണായക തീരുമാനമാണിതെന്നും അദ്ദേഹം കൂട്ടിച്ചേർത്തു. ഗുജറാത്തിൽ നടന്ന നിക്ഷേപകസംഗമത്തിലാണ്​ വാഹനം പൊളിക്കുന്നതിന്​ പുതിയ നയം പ്രധാനമന്ത്രി പ്രഖ്യാപിച്ചത്​.

ഇന്ത്യയുടെ വികസന യാത്രയിലെ ഒരു നാഴികല്ലാണ്​ വാഹനം പൊളിക്കൽ നയം. യുവാക്കളും സ്റ്റാർട്ട്​ അപ്​ സംരംഭങ്ങളുടെ ഇതിന്‍റെ ഭാഗമാവണം. ഇതിലൂടെ മലിനീകരണം സൃഷ്​ടിക്കുന്ന വാഹനങ്ങൾ നിരത്തിൽ നിന്നും ഒഴിവാക്കാൻ സാധിക്കുമെന്നും അദ്ദേഹം പറഞ്ഞു. പുതിയ നയം 10,000 കോടിയുടെ നിക്ഷേപവും 35,000 തൊഴിലവസരങ്ങളും രാജ്യത്ത്​ സൃഷ്​ടിക്കുമെന്നും അദ്ദേഹം വ്യക്​തമാക്കി.

നയത്തിന്‍റെ ഭാഗമായി രാജ്യത്ത്​ 70 വാഹനം പൊളിക്കൽ കേന്ദ്രങ്ങൾ തുടങ്ങും. നയപ്രകാരം സ്വകാര്യ വാഹനങ്ങളുടെ പരാമാവധി കാലാവധി 20 വർഷമാണ്​. വാണിജ്യവാഹനങ്ങൾ 15 വർഷത്തിന്​ ശേഷം നിരത്തൊഴിയേണ്ടി വരും. 2022 മുതൽ കാലാവധി പൂർത്തിയാക്കിയ കേന്ദ്ര-സംസ്ഥാന സർക്കാർ വാഹനങ്ങൾക്ക്​ പുതിയ നയം നടപ്പിലാക്കും. 2023 മുതൽ ഹെവി വാഹനങ്ങൾക്ക്​ നയം ബാധകമാക്കും. 2024 ജൂൺ മുതലാവും സ്വകാര്യ വാഹനങ്ങൾക്ക്​ നയം ബാധകമാവുക.