നരേന്ദ്ര മോദി യു.എസ് സന്ദർശിക്കുമെന്ന് വൈറ്റ് ഹൗസ്

ന്യൂഡൽഹി: പ്രധാനമന്ത്രി നരേന്ദ്ര മോദി യു.എസ് സന്ദർശിക്കും. ജൂൺ 22ന് ​യു.എസ് പ്രസിഡന്റ് ജോ ബൈഡന്റെ ക്ഷണപ്രകാരമാണ് മോദിയുടെ സന്ദർശനം. ജോ ബൈഡനും ​പ്രഥമവനിത ജിൽ ബൈഡനും സംയുക്തമായാണ് മോദി സന്ദർശനം നടത്തുന്ന വിവരം അറിയിച്ചത്. ബൈഡനു​മൊത്ത് മോദി അത്താഴവും കഴിക്കും.

ഇന്ത്യയും യു.എസും തമ്മിലുള്ള തന്ത്രപരമായ സൗഹൃദത്തിനാണ് സന്ദർശനത്തിൽ ഊന്നൽ. ഇരു രാജ്യങ്ങൾക്കും താൽപര്യമുള്ള മേഖലകളിലെ ഉഭയകക്ഷി ബന്ധത്തിന്റെ പുരോഗതി രാഷ്ട്രതലവൻമാർ വിലയിരുത്തും. സാ​ങ്കേതിക വിദ്യ, വ്യാപാരം, വാണിജ്യം തുടങ്ങിയ മേഖലകളിലെ ഉഭയകക്ഷി ബന്ധം മെച്ചപ്പെടുത്താനുള്ള ശ്രമങ്ങളുമുണ്ടാവും.

2021ലും ​നരേന്ദ്ര മോദി യു.എസ് സന്ദർശിച്ചിരുന്നു. ക്വാഡ് ഉച്ചകോടിയുടെ ഭാഗമായിട്ടായിരുന്നു സന്ദർശനം. ഇന്ത്യക്കും യു.എസിനും പുറമേ ജപ്പാനും ആസ്ട്രേലിയയും ഉച്ചകോടിയിൽ പ​ങ്കെടുത്തിരുന്നു. അന്ന് പൂർണമായ സന്ദർശനമായിരുന്നില്ല മോദി നടത്തിയത്. നേരത്തെ പ്രതിരോധ മേഖലയിൽ ഇന്ത്യ-യു.എസ്‍ സഹകരണം പ്രഖ്യാപിച്ചിരുന്നു.