രാജ്യത്തിന്‍റെ പ്രതിച്ഛായ ഉയർത്താൻ പ്രധാനമന്ത്രി കഠിനാധ്വാനം ചെയ്യുന്നു, പ്രതിപക്ഷം അതിനെ കളങ്കപ്പെടുത്തുന്നു​ -നിർമല സീതാരാമൻ

ന്യൂഡൽഹി: രാജ്യത്തിന്‍റെ പ്രതിച്​ഛായ ഉയർത്താൻ പ്രധാനമന്ത്രി നരേ​ന്ദ്ര മോദി കഠിനാധ്വാനം ചെയ്യുകയാണെന്നും എന്നാൽ, പ്രതിപക്ഷം അതിനെയെല്ലാം കളങ്കപ്പെടുത്തുകയാണെന്നും ധനമന്ത്രി നിർമല സീതാരാമൻ. ബി.ജെ.പി ദേശീയ എക്‌സിക്യൂട്ടീവ് യോഗത്തിൽ സംസാരിക്കുകയായിരുന്നു മന്ത്രി. ഇന്ത്യയുടെ കോവിഡ്​ വാക്‌സിനേഷൻ പ്രോഗ്രാം ലോകമെമ്പാടും പ്രശംസിക്കപ്പെട്ടപ്പോൾ, കുത്തിവെപ്പിനെതിരെ പ്രതിപക്ഷം ആദ്യം മുതൽ തെറ്റായ സന്ദേശമാണ്​ ​പ്രചരിപ്പിക്കുന്നതെന്ന്​ നിർമല കുറ്റപ്പെടുത്തി.

'100 കോടിയിലധികം വാക്സിൻ ഡോസുകൾ നൽകിയ ഇന്ത്യയുടെ മഹത്തായ രീതി ലോകമെമ്പാടും പ്രശംസിക്കപ്പെട്ടു. വാക്സിനേഷനും ആരോഗ്യ പരിരക്ഷാ അടിസ്ഥാന സൗകര്യങ്ങൾ മെച്ചപ്പെടുത്താനുമായി ബജറ്റിൽ 36,000 കോടി രൂപ നീക്കിവെച്ചിട്ടുണ്ട്​. പ്രതിരോധത്തിലും കരസേനയിലും സ്ത്രീകളുടെ പ്രവേശനവും സൈനിക് സ്‌കൂളുകൾ സ്ഥാപിക്കുന്നതും തീരുമാനത്തിന്‍റെ ഭാഗമാണ്​. സ്ത്രീകൾ നയിക്കുന്ന വികസനമാണ് നമ്മുടെ മുദ്രാവാക്യം' -മന്ത്രി പറഞ്ഞു.

'പ്രധാനമന്ത്രി ഗരീബ് കല്യാൺ യോജനയ്ക്ക് കീഴിൽ 80 കോടി ആളുകൾക്ക് എട്ട്​ മാസത്തേക്ക് സൗജന്യ റേഷൻ നൽകി. ഒരു രാജ്യം, ഒരു റേഷൻ കാർഡ് പദ്ധതി ആരംഭിച്ചു. ഇതുവഴി കുടിയേറ്റ തൊഴിലാളികൾക്ക് അവരുടെ റേഷൻ കാർഡുകൾ രജിസ്റ്റർ ചെയ്യാത്ത മറ്റ് സംസ്ഥാനങ്ങളിലെ ജോലിസ്ഥലത്തുനിന്ന് റേഷൻ ലഭിക്കുന്നു.

ജമ്മു കശ്​മീർ ഭീകരവാദത്തിൽനിന്ന്​ വികസനത്തിലേക്ക്​ നീങ്ങുകയാണ്​. 2004നും 2014നും ഇടയിൽ ജമ്മു കശ്മീരിൽ തീവ്രവാദവുമായി ബന്ധപ്പെട്ട സംഭവങ്ങളിൽ 2081 പേർ മരിച്ചു. എന്നാൽ, 2014 മുതൽ 2021 സെപ്റ്റംബർ വരെ 239 സിവിലിയന്മാർക്കാണ് ജീവൻ നഷ്ടപ്പെട്ടത്​. അവിടെ സമാധാനം സ്ഥാപിക്കപ്പെട്ടുവെന്നാണ് ഇത് തെളിയിക്കുന്നത്​' -നിർമല അവകാശപ്പെട്ടു.

'ഇന്ത്യയിൽ വൻ മാറ്റങ്ങളാണ് വരുന്നത്. ഡിജിറ്റൽ ഇന്ത്യ മിഷൻ അവയെ ത്വരിതപ്പെടുത്തുകയാണ്. മേക്ക് ഇൻ ഇന്ത്യയും ഡിജിറ്റൽ ഇന്ത്യ മിഷനും ചേർന്നുള്ള ആത്മനിർഭർ ഭാരത് രാജ്യത്തെ ശക്തിപ്പെടുത്തും' -അവർ കൂട്ടിച്ചേർത്തു. തെരഞ്ഞെടുപ്പിന് ശേഷമുള്ള ബംഗാളിലെ അക്രമങ്ങളെ അപലപിച്ച മന്ത്രി, എല്ലാ നിയമ നടപടികളിലും പാർട്ടി ബി.ജെ.പി പ്രവർത്തകർക്ക്​ ഒപ്പം നിൽക്കുമെന്നും പറഞ്ഞു.