മുസ്ലിം വയോധികനുനേരേ ആക്രമണം; സംഭവം പുറത്തുകൊണ്ടുവന്ന യുവാവിനുമേൽ എൻ.എസ്​.എ ചുമത്തും

ഗാസിയാബാദ്​: ഉത്തർപ്രദേശിലെ ഗാസിയാബാദിൽ മുസ്​ലിം വയോധികനെ സംഘം ചേർന്ന്​ മർദിക്കുകയും താടി മുറിക്കുകയും ചെയ്​ത സംഭവം പുറംലോകത്ത്​ എത്തിച്ച യുവാവിനുനേരേ നാഷനൽ സെക്യൂരിറ്റി ആക്​ട്​ (എൻ.എസ്​.എ) ചുമത്തും. സമാജ്​വാദി പാർട്ടിയുടെ പ്രാദേശികനേതാവുകൂടിയായ ഉമൈദ്​ പെഹൽവാൻ ഇദ്​രീസിക്കെതിരായാണ്​ കരിനിയമം ചുമത്തുന്നത്​. ആക്രമണത്തിന്​ ഇരയായ വയോധികൻ അബ്​ദുസ്സമദുമൊത്ത്​ ഇദ്​രീസി ഫേസ്​ബുക്ക്​ ലൈവ്​ ചെയ്​തിരുന്നു. അതിനുശേഷമാണ്​ സംഭവം പുറംലോകത്ത്​ എത്തിയതും വലിയ വിവാദമായതും.

ആക്രമണത്തിന്​ വർഗീയ നിറംപകരാൻ ശ്രമിച്ചു എന്നുപറഞ്ഞാണ്​ ഇദ്​രീസിയെ അറസ്​റ്റ്​ ചെയ്​തത്​. ജൂൺ 19നായിരുന്നു അറസ്​റ്റ്​. നിലവിൽ യുവാവിനെതിരേ എൻ.​എസ്​.എ ചുമത്താൻ പൊലീസ്​ സർക്കാറിനോട്​ ശുപാർശ ​ചെയ്​തിട്ടുണ്ട്​. എൻ.എസ്​.എ ചുമത്തിയാൽ ഒരുവർഷംവരെ ഇദ്ദേഹത്തെ പൊലീസിന്​ കസ്​റ്റഡിയിൽ വയ്​ക്കാൻ കഴിയും. ഇന്ത്യൻ പീനൽ കോഡ് (ഐപിസി) സെക്ഷനുകൾ 153 എ (മതത്തി​െൻറ അടിസ്ഥാനത്തിൽ ഗ്രൂപ്പുകൾ തമ്മിലുള്ള ശത്രുത വളർത്തൽ), 295 എ (മനപൂർവം ക്ഷുദ്രകരവുമായ പ്രവർത്തനങ്ങൾ, മതത്തെയും മതവിശ്വാസത്തെയും അപമാനിക്കൽ) 504 (സമാധാനം ലംഘിക്കാൻ പ്രേരിപ്പിക്കുന്ന ഉദ്ദേശ്യത്തോടെയുള്ള പ്രവർത്തനം), 505 (പൊതു കുഴപ്പം) തുടങ്ങിയ വകുപ്പുകൾപ്രകാരവും ഇദ്​രീസിക്കെതിരേ കേസെടുത്തിട്ടുണ്ട്​.

അക്രമം പുറത്തുകൊണ്ടുവന്നാൽ കേസ്​

സംഭവം പുറത്തുവന്നശേഷം ഇതിനെതിരേ പ്രതികരിച്ച നിരവധിപേർക്കെതിരേ യു.പി പൊലീസ്​ കേസെടുത്തിരുന്നു. സംഭവവുമായി ബന്ധപ്പെട്ട ട്വീറ്റുകൾ നടത്തിയ ഒമ്പത്​ പ്രമുഖർക്കെതിരെ കേസെടുത്തിട്ടുണ്ട്​.​ രണ്ട്​ കോൺഗ്രസ്​ നേതാക്കളും കേസിൽ പ്രതികളാണ്​. ട്വിറ്ററിനേയും പ്രതിചേർത്തിട്ടുണ്ട്​. സംഭവത്തിന്​ മനപ്പൂർവം സാമുദായിക മുഖം നൽകാൻ ശ്രമിച്ചുവെന്ന്​ ആരോപിച്ചാണ്​ കേസ്​.

ദ വയർ, റാണ അയ്യൂബ്​, മുഹമ്മദ്​ സുബൈർ, ഡോ.ഷമ മുഹമ്മദ്​, സാബ നഖ്​വി, മസ്​കൂർ ഉസ്​മാനി, സൽമാൻ നിസാമി എന്നിവർ വസ്​തുതകൾ പരിശോധിക്കാതെ സംഭവത്തിന്​ വർഗീയ മുഖം നൽകിയെന്നാണ്​ യു.പി പൊലീസ്​ ആരോപണം. വയോധികനെ ആക്രമിക്കുന്ന വിഡിയോ പ്രചരിക്കുന്നത്​ തടയാത്തതിനാണ്​ ട്വിറ്ററിനെതിരെ കേസെടുത്തിരിക്കുന്നത്​.

കേസെടുത്തിരിക്കുന്നവരിൽ അയൂബും നഖ്​വിയും മുതിർന്ന മാധ്യമപ്രവർത്തകരാണ്​. ഫാക്​ട്​ ചെക്കിങ്​ വെബ്​സൈറ്റായ ആൾട്ട്​ ന്യൂസിലെ ലേഖകനാണ്​ സുബൈർ. ഷമ മുഹമ്മദും നിസാമിയും കോൺഗ്രസ്​ നേതാക്കളാണ്​. അലിഗഢ്​ മുസ്​ലിം യൂണിവേഴ്​സിറ്റിയിലെ മുൻ വിദ്യാർഥി യൂനിയൻ പ്രസിഡൻറാണ്​ ഉസ്​മാനി.

കേസ്​ വഴിതിരിച്ചുവിടുന്നതായി കുടുംബം

അതേസമയം വയോധികനെ ആക്രമിച്ച സംഭവം പൊലീസ്​ വഴിതിരിച്ചുവിടാൻ ശ്രമിക്കുന്നതായി കുടുംബം പറയുന്നു. മന്ത്രത്തകിട്​ വിൽപനയെ ചൊല്ലിയാണ്​ മർദനമെന്ന വാദം പൊലീസ്​ സൃഷ്​ടിയാണെന്ന്​ വൃദ്ധന്‍റെ മക്കൾ മാധ്യമങ്ങളോട്​ പറഞ്ഞു. സംഭവത്തെ കുറിച്ച്​ അഭിപ്രായം പ്രകടിപ്പിച്ചവർക്കെ​തിരെ ​കേസെടുത്തതിന്​ തൊട്ടുപിന്നാലെയാണ്​ കുടുംബത്തിന്‍റെ വെളിപ്പെടുത്തൽ.

ജൂൺ അഞ്ചിനാണ്​ അബ്​ദുസ്സമദ്​ എന്ന വയോധികന്​ മർദനം ഏറ്റത്​​. ദിവസങ്ങൾക്ക്​ ശേഷമാണ്​ ഇതി​െൻറ​ വിഡിയോ പുറത്തായത്​. തന്നെ ഏതാനും പേർ തട്ടിക്കൊണ്ടുപോയി ജയ്​ ശ്രീറാം, വന്ദേ മാതരം എന്നിവ വിളിക്കാൻ ആവശ്യപ്പെട്ട്​ മർദിക്കുകയായിരുന്നുവെന്ന്​ അബ്​ദുസ്സമദ്​ പറഞ്ഞിരുന്നു. എന്നാൽ, പ്രവർത്തനരഹിതമായ മന്ത്രത്തകിട്​ വിറ്റതിനാണ്​ പ്രതികൾ ഇയാളെ മർദിച്ചതെന്നായിരുന്നു​ പൊലീസ്​ വാദം. കേസിൽ സാമുദായിക വിവേചനം ഒന്നുമില്ലെന്നും പ്രതികളിൽ ഹിന്ദുക്കളും മുസ്​ലിംകളും അടക്കം ആറുപേരുണ്ടെന്നും പൊലീസ്​ പറയുന്നു.

ഈ ആരോപണം പച്ചക്കള്ളമാണന്ന്​ അബ്ദുസ്സമദിന്‍റെ മകൻ ബബ്‌ലൂ സെയ്​ഫി എൻ‌.ഡി‌.ടി‌.വിയോട് പറഞ്ഞു. 'എൻെറ പിതാവ് മന്ത്രത്തകിട്​വിൽക്കാറുണ്ടെന്ന് പൊലീസ് പറഞ്ഞത്​ തെറ്റാണ്. ഞങ്ങളുടെ കുടുംബത്തിൽ ആരും ഈ ബിസിനസ്സ് നടത്തുന്നില്ല. ഞങ്ങൾ എല്ലാവരും മരപ്പണിക്കാരാണ്. പൊലീസ് പറയുന്നതൊന്നും ശരിയല്ല. സത്യം എന്താണെന്ന്​ അന്വേഷിച്ച് ക​ണ്ടെത്തട്ടെ. നാല് മണിക്കൂർ പിതാവ്​ പീഡിപ്പിക്കപ്പെട്ടു''-അദ്ദേഹം പറഞ്ഞു.

പിതാവ്​ അക്രമിക്കപ്പെട്ടതിന്‍റെ തൊട്ടടുത്ത ദിവസം, ജൂൺ ആറിന് തന്നെ ലോണി പൊലീസ് സ്റ്റേഷനിൽ ഇവർ പരാതി നൽകിയിരുന്നു. അതിൽ നടന്ന സംഭവങ്ങൾ അതുപോലെ വിശദീകരിച്ചിരുന്നതായും മകൻ പറഞ്ഞു. അക്രമത്തെ കുറിച്ച്​ സമദ്​ പറയുന്നതിങ്ങനെ: 'സംഭവ ദിവസം പള്ളിയിൽ പോകു​േമ്പാൾ ഒരാൾ ഓ​ട്ടോറിക്ഷയുമായി വന്ന്​ ലിഫ്​റ്റ്​ നൽകി. പിന്നീട്​ രണ്ടുപേർ കൂടി അതിൽ കയറി. എന്നിട്ട് അവർ ഒരു വീട്ടിലേക്ക്​ കൊണ്ടുപോയി തല്ലി. ജയ്​ ശ്രീറാം, വന്ദേമാതരം എന്നിവ വിളിക്കാൻ അവർ നിർബന്ധിച്ചു. അവർ എൻെറ മൊബൈൽ എടുത്തു. കത്തിയെടുത്ത്​ താടി മുറിച്ചു. മറ്റു മുസ്‌ലിംകൾ ആക്രമിക്കപ്പെടുന്നതിന്‍റെ ഒരു വീഡിയോ എനിക്ക് കാണിച്ചുതന്നു. ഇതിനുമുമ്പ് നിരവധി മുസ്‌ലിംകളെ കൊന്നതായി അവർ പറയുന്നുണ്ടായിരുന്നു''.