പൂജ ഖേദ്​കർ: ആഡംബര മോഹം കുരുക്കിലാക്കിയത്​ കുടുംബത്തെയാകെ

മുംബൈ: സിവിൽ സർവിസ്​ ട്രെയ്നിയായ പൂജ ഖേദ്​കറുടെ അമിതാധികാര പ്രയോഗ വിവാദത്തിൽ വെട്ടിലായി കുടുംബം. പൂജ മാത്രമല്ല, പിതാവ്​ ദിലീപ്​ ഖേദ്​കറും അമ്മ മനോരമ ഖേദ്​കറും നിയമനടപടികൾ നേരിടുകയാണ്​. കർഷകരെ തോക്ക്​ ചൂണ്ടി ഭീഷണിപ്പെടുത്തിയ കേസിൽ അമ്മ മനോരമ അറസ്റ്റിലും പിതാവ്​ ദിലീപ്​ ഖേദ്​കർ ഒളിവിലുമാണ്​. മനോരമ അറസ്റ്റിലായതോടെ ദിലീപ്​ ഖേദ്​കർ മുൻകൂർ ജാമ്യം തേടി​. പൂജ അടക്കം ഖേദ്​കർ കുടുംബം അനധികൃത സ്വത്ത്​ സമ്പാദ്യവുമായി ബന്ധപ്പെട്ട്​ അന്വേഷണവും നേരിടുന്നു. സിവിൽ സർവിസ്​ നേടി പുണെയിൽ ട്രെയ്നിങ്ങിനെത്തിയ പൂജയുടെ ആഡംബര മോഹവും അമിതാധികാരവുമാണ്​ ഇതിനെല്ലാം കാരണമായത്​.

അസിസ്റ്റന്റ്​ കലക്ടർ ട്രെയ്നിയായി പുണെയിൽ ജോയന്റ് ചെയ്യും മുമ്പേ പൂജ തനിക്ക്​ പ്രത്യേക കാബിൻ, പേഴ്​സനൽ സ്റ്റാഫ്​, സർക്കാർ ബോർഡും ബീക്കണുമായി ആഡംബര കാർ തുടങ്ങിയവക്ക്​ വാശിപിടിച്ചതാണ്​ പ്രശ്​നങ്ങൾക്ക്​ തുടക്കം. പുണെ കലക്ടർ ചീഫ്​ സെക്രട്ടറിക്ക്​ റിപ്പോർട്ട്​ നൽകിയതോടെ പൂജയെ വാഷിം ജില്ലയിലേക്ക്​ സ്ഥലം മാറ്റിയിരുന്നു. നിലവിൽ പരിശീലനം റദ്ദാക്കി പൂജയെ തിരിച്ചുവിളിച്ചിരിക്കുകയാണ്​.

ഇതിനിടയിൽ, സിവിൽ സർവിസ്​ നേടാൻ പൂജ സമർപ്പിച്ച ഒ.ബി.സി ക്രീമിലയർ, കാഴ്ച വൈകല്യവുമായി ബന്ധപ്പെട്ട വൈദ്യ റിപ്പോർട്ട്​ എന്നിവ വ്യാജമാണെന്ന ആരോപണമുയർന്നു. വിവരാവകാശ പ്രവർത്തകൻ വിജയ്​ കുംഭാരെയാണ്​ ഇതിനു പിന്നിൽ. സ്വന്തമായി പൂജക്ക്​ 17 കോടി രൂപയോളം മൂല്യമുള്ള സ്വത്തും 42 ലക്ഷം വാർഷിക വരുമാനവുമുണ്ടെന്നാണ്​ ആരോപണം.

പിതാവും മുൻ മഹാരാഷ്ട്ര ഉന്നത സർക്കാർ ഉദ്യോഗസ്ഥനുമായ ദിലീപ്​ ഖേദ്​കർക്ക്​ 42 കോടിയുടെ സ്വത്തുമുണ്ട്​. കഴിഞ്ഞ ലോക്​സഭ തെരഞ്ഞെടുപ്പിൽ അഹ്മദ്​നഗറിൽ വഞ്ചിത്​ ബഹുജൻ അഘാഡി സ്ഥാനാർഥിയായിരുന്നു ദിലീപ്​. തെരഞ്ഞെടുപ്പ്​ കമീഷന്​ ദിലീപ്​ സമർപ്പിച്ച രേഖകളിൽനിന്നാണ്​ പൂജയുടെതടക്കം സ്വത്ത്​ വിവരങ്ങൾ വിജയ്​ കുംഭാരെ കണ്ടെത്തിയത്​. അവിഹിത സ്വത്ത്​ സമ്പാദ്യവുമായി ബന്ധപ്പെട്ട്​ ദിലീപിന്​ എതിരെ അന്വേഷണം നടന്നുവരുകയാണ്​.