സ്ഥാനമൊഴിയുമ്പോള്‍ പ്രണബിന് കലാമിന്‍െറ വസതി

ന്യൂഡല്‍ഹി: രാഷ്ട്രപതി പ്രണബ് മുഖര്‍ജിക്ക് സ്ഥാനമൊഴിയുമ്പോള്‍ താമസിക്കാന്‍ എ.പി.ജെ. അബ്ദുല്‍ കലാമിന്‍െറ വസതി. ഡല്‍ഹിയിലെ 10 രാജാജി മാര്‍ഗിലുള്ള ലൂട്ടിയന്‍സ് ബംഗ്ളാവാണ് കലാം ഉപയോഗിച്ചിരുന്നത്. ജൂലൈ അവസാനത്തോടെ കാലാവധി അവസാനിക്കുന്ന പ്രണബ് മുഖര്‍ജി വിരമിച്ച ശേഷം താമസത്തിന് ഈ വീട് ആവശ്യപ്പെടുകയായിരുന്നു. ലൈബ്രറിയും വായനമുറിയുമടക്കം വിശാല സൗകര്യമാണ് ലൂട്ടിയന്‍സിലുള്ളത്.

രാഷ്ട്രപതിയായി വിരമിക്കുന്നവര്‍ക്ക് ശിഷ്ടകാലം ജീവിക്കുന്നതിന് അവര്‍ ഇന്ത്യയില്‍ ആവശ്യപ്പെടുന്ന സ്ഥലത്ത് സൗകര്യം ഒരുക്കണമെന്നാണ് നിയമം. വെള്ളം, വൈദ്യുതി തുടങ്ങി എല്ലാ സൗകര്യങ്ങളും സൗജന്യമായി നല്‍കണമെന്നുമുണ്ട്.