മതപരിവർത്തന വിരുദ്ധ നിയമം; യുപിയിൽ ഗർഭിണിയായ യുവതിയെ സർക്കാർ അഭയകേന്ദ്രത്തിലാക്കി

ലഖ്​നൗ: ഉത്തർപ്രദേശിലെ പുതിയ മത പരിവർത്തന വിരുദ്ധ നിയമപ്രകാരം ഭർത്താവിനെയും ഭർതൃ സഹോദരനെയും അറസ്​റ്റ്​ ചെയ്തതിനെ തുടർന്ന് സർക്കാർ അഭയകേന്ദ്രത്തിലേക്ക് കൊണ്ടുപോയ ഗർഭിണിയായ യുവതിയെ വയറുവേദനയും രക്തസ്രാവവും കാരണം മൂന്ന് ദിവസത്തിനുള്ളിൽ ആശുപത്രിയിൽ പ്രവേശിപ്പിച്ചത്​​ രണ്ടു തവണ. യുവതിയെ മൊറാദാബാദ്​ ജില്ലയിലെ പൊലീസ്​ സ്​റ്റേഷനിൽ വെച്ച്​ ബജ്​റംഗ്​ദൾ പ്രവർത്തകർ ഭീഷണിപ്പെടുത്തുന്ന വിഡിയോ സമൂഹ മാധ്യമങ്ങളിൽ വൈറലായിരുന്നു.

അതേസമയം, അഭയകേന്ദ്രത്തിൽ വെച്ച്​ യുവതിയുടെ ഗർഭം അലസിപ്പോയെന്ന റിപ്പോർട്ടുകൾ സർക്കാർ നിഷേധിച്ചു. 'പത്രത്തിൽ വന്ന റിപ്പോർട്ടുകൾ തെറ്റാണ്' -സംസ്ഥാന ശിശു അവകാശ പാനൽ മേധാവി വിശേഷ് ഗുപ്ത പറഞ്ഞു. ഞായറാഴ്ച യുവതിയെ ഡിസ്ചാർജ് ചെയ്തിട്ടുണ്ടെന്നും മൂന്ന് മാസം ഗർഭിണിയാണെന്നും കുഞ്ഞിന് ഹൃദയമിടിപ്പ് ഉണ്ടായിരുന്നുവെന്നും അദ്ദേഹം പറഞ്ഞു.

കഴിഞ്ഞ ജൂലൈയിൽ വിവാഹ സമയത്തായിരുന്നു​ 22കാരിയായ യുവതി ഇസ്​ലാം മതം സ്വീകരിച്ചത്​. ഡിസംബർ അഞ്ചിന്​ വിവാഹം രജിസ്​റ്റർ ചെയ്യാൻ പോയപ്പോഴാണ്​ യുവതിയെയും ഭർത്താവിനെയും സഹോദരനെയും ബജ്​റംഗ്​ദൾ പ്രവർത്തകർ ഭീഷണിപ്പെടുത്തി പൊലീസ്​ സ്​റ്റേഷനിലേക്ക്​ വലിച്ചിഴച്ചുകൊണ്ടുപോയത്​. യുവതിയുടെ ഭർത്താവിനെയും അയാളുടെ സഹോദരനെയും 'വഞ്ചനാപരവും നിർബന്ധിതവുമായ മതപരിവർത്തനം' നിരോധിച്ചുകൊണ്ടുള്ള പുതിയ നിയമങ്ങൾ ​പ്രകാരമാണ്​ അറസ്റ്റ്​ ചെയ്​തത്​.

നിയമം പ്രാബല്യത്തിൽ വരുന്നതിന് നാല് മാസം മുമ്പാണ് താൻ വിവാഹം കഴിച്ചതെന്നും എന്നാൽ അതുകൊണ്ടൊന്നും പൊലീസ്​ തങ്ങളെ വെറുതെ വിട്ടില്ലെന്നും യുവതി മാധ്യമപ്രവർത്തകരോട് പറഞ്ഞു.