പീഡനത്തിൽ നിന്ന്​ രക്ഷപ്പെടാൻ ഒാടുന്ന വാനിൽ നിന്നും ചാടിയ ഗർഭിണി മരിച്ചു

തെലങ്കാന: യാത്രക്കിടെ വാനിലെ ജീവനക്കാർ പീഡിപ്പിക്കാൻ ശ്രമിച്ചതിനെ തുടർന്ന്​ വാഹനത്തിൽ നിന്നും ചാടിയ ഗർഭിണി മരിച്ചു. തെലങ്കാനയിലെ മേദക്​ ജില്ലയിലെ ഹൈദരാബാദ്​- നാഗ്​പൂർ ഹൈവേയി​ലാണ്​​ സംഭവം.  ഉദി കലാവതി (35) ആണ്​ മരിച്ചത്​. 

ശനിയാഴ്​ച രാത്രി ഹൈദരാബാദിനടുത്ത കോമ്പള്ളിയിൽ നിന്നും ഏഴുവയസുകാരിയായ മകളുമൊത്ത്​ വാനിൽ യാത്രചെയ്​ത കലാവതിയെ ഡ്രൈവറും ക്ലീനറും ചേർന്ന്​ പീഡിപ്പിക്കാൻ ശ്രമിക്കുകയായിരുന്നു. അവസാന ബസും പോയികഴിഞ്ഞതിനാൽ ​കോമ്പള്ളിയിൽ നിന്ന്​ തൂപ്രാൻ ടോൾപ്ലാസ വരെ എത്തിക്കാമെന്ന്​ പറഞ്ഞ്​ ഇവരെ വാനിൽ കയറ്റുകയായിരുന്നു. എന്നാൽ വിജനമായ സ്ഥലത്തെത്തിയപ്പോൾ ഡ്രൈവറും ക്ലീനറും ചേർന്ന്​ ഇവരെ പീഡിപ്പിക്കാൻ ശ്രമിച്ചു. പീഡനത്തിൽ നിന്നും രക്ഷപ്പെടാൻ ഏഴുമാസം ഗർഭിണിയായ കലാവതി വാനി​​​െൻറ ഡോർ തുറന്ന്​ പുറത്തേക്ക്​ ചാടുകയായിരുന്നു. യുവതി ചാടിയതിനു പിറകെ വാനിലുള്ള മകളെയും ഇതേസ്ഥലത്ത്​ ഇറക്കി വിട്ട്​ അക്രമികൾ രക്ഷപ്പെട്ടു. 

സംഭവം ശ്രദ്ധയിൽപ്പെട്ട്​ സമീപവാസിക​ൾ എത്തു​േമ്പാഴേക്കും കലാവതി മരണപ്പെട്ടിരുന്നു. തുടർന്ന്​ പൊലീസ്​ എത്തി മൃത​ദേഹം ആശുപത്രിയിലേക്കു മാറ്റുകയും ബന്ധുക്കളെ അറിയിക്കുകയും ചെയ്​തു.

കലാവതി വാഹനത്തിൽ നിന്നും ചാടുന്നതി​​​െൻറ സിസി ടിവി ദൃശ്യങ്ങൾ പൊലീസിന്​ ലഭിച്ചിട്ടുണ്ട്​. ഒാടുന്ന വാഹനത്തിൽ നിന്ന്​ അവരുടെ കയ്യിലുണ്ടായിരുന്ന ബാഗ്​ പുറത്തേക്കിടുന്നതും ഡ്രൈവർ ബ്രേക്ക്​ ചവിട്ടി നിർത്തുന്നതും  കലാവതി ചാടുന്നതിന്​ മുമ്പ്​ വണ്ടി മുന്നോ​െട്ടടുക്കുന്നതും ദൃശ്യത്തിലുണ്ട്​. 
വാഹനത്തിൽ നിന്നും ചാടുന്നതിന്​ മുമ്പ്​ കലാവതി വാനിലെ ഡ്രൈവറോടും ക്ലീനറോടും വഴക്കിട്ടിരുന്നതായി മകൾ പൊലീസിന്​ മൊഴി നൽകി.  കലാവതിയുടെ ബന്ധുക്കളുടെ പരാതിയിൽ പൊലീസ്​ കേസെടുത്തു. പ്രതികളെ പിടികൂടാനായിട്ടില്ല.