ലോയ കേസിൽ അന്വേഷണം തടയൽ: മഹാരാഷ്​ട്ര അഭിഭാഷകന്​ നൽകിയത്​ 1.21 കോടി

മുംബൈ: സി.ബി.​െഎ പ്രത്യേക ജഡ്​ജിയായിരുന്ന ബ്രിജ്​ഗോപാൽ ഹർകിഷൻ ലോയയുടെ മരണത്തിൽ സ്വതന്ത്ര അന്വേഷണം ആവശ്യപ്പെട്ടുള്ള ഹരജി എതിർക്കുന്നതിന്​​ മഹാരാഷ്​ട്ര ചെലവിട്ടത്​ ഒന്നേകാൽ കോടി രൂപ.

മഹാരാഷ്​ട്ര സർക്കാറിനുവേണ്ടി സുപ്രീംകോടതിയിൽ ഹാജരായതിന്​ മുതിർന്ന അഭിഭാഷകൻ മുകുൾ രോഹത​ഗിക്കാണ്​​ 1.21 കോടി രൂപ അനുവദിച്ചത്​. രോഹത​ഗിയെ കേസിൽ സംസ്​ഥാനം സ്​പെഷൽ പ്രോസിക്യൂട്ടറായി നിയമിച്ചിരുന്നു. ഇന്ത്യയുടെ മുൻ സോളിസിറ്റർ ജനറലും മുതിർന്ന അഭിഭാഷകനുമായ ഹരീഷ്​ സാൽവെയാണ്​ മറ്റൊരു പബ്ലിക്​ പ്രോസിക്യൂട്ടർ.

വിവരാവകാശ പ്രവർത്തകൻ ജതിൻ ദേശായ്​ സമർപ്പിച്ച ആർ.ടി.​െഎ അപേക്ഷക്കുള്ള മറുപടിയിലാണ്​ ഫീസ്​ വിവരം പുറത്തുവന്നത്​. ഇൗ വിഷയത്തിൽ രോഹതഗി സുപ്രീംകോടതിയിൽ 11 തവണയാണ്​ ഹാജരായത്​. ഒാരോ ഹിയറിങ്ങിനും 11 ലക്ഷമാണ്​ ഫീസ്​. സാൽവെക്ക്​ നൽകിയ തുകയുടെ കാര്യം മറുപടിയിൽ ഇല്ല. ലോയയുടെ മരണത്തിലെ സ്വതന്ത്രാന്വേഷണം എന്ന ആവശ്യം സുപ്രീംകോടതി ഏപ്രിലിൽ തള്ളിയിരുന്നു.