പൊട്ടിക്കരഞ്ഞ് ഹാഥറസ് പെൺകുട്ടിയുടെ മാതാവ്; കൂടെയുണ്ടെന്ന് ആശ്വസിപ്പിച്ച് പ്രിയങ്ക

ലഖ്നോ: ക്രൂരമായി പിച്ചിച്ചീന്തി കൊല്ലപ്പെട്ട മകളെ അവസാനമായി ഒരുനോക്ക് കാണാനാവാത്ത മാതാവിന്‍റെ വേദന ആരുടെയും കരളലിയിപ്പിക്കുന്നതായിരുന്നു. ഹാഥറസിൽ കൂട്ടബലാത്സംഗത്തിനിരയായി കൊല്ലപ്പെട്ട ദലിത് പെൺകുട്ടിയുടെ വീട്ടിൽ കോൺഗ്രസ് നേതാക്കളായ പ്രിയങ്ക ഗാന്ധിയും രാഹുൽ ഗാന്ധിയും എത്തിയപ്പോൾ ആ അമ്മക്ക് മുന്നിൽ ആശ്വാസവാക്കുകൾ മതിയായില്ല. ആശ്വസിപ്പിക്കാനെത്തിയ പ്രിയങ്കയെ കെട്ടിപ്പിടിച്ച് അവർ തന്‍റെ വേദനകൾ പറഞ്ഞു.

അവരുടെ വേദനയും ദു:ഖവും തനിക്ക് മനസിലാക്കാൻ കഴിയുമെന്ന് പ്രിയങ്ക പിന്നീട് പറഞ്ഞു. തനിച്ചാണെന്ന് കരുതരുത്. അവരുടെ വേദന തന്‍റേതു കൂടിയാണ്. താൻ എപ്പോഴും കൂടെയുണ്ടാകുമെന്നും നീതി ലഭിക്കും വരെ പോരാടുമെന്നും അവർക്ക് വാക്കു നൽകിയതായും പ്രിയങ്ക പറഞ്ഞു.

കനത്ത സുരക്ഷാവലയത്തിലാണ്​ പ്രിയങ്കയും രാഹുലും പെൺകുട്ടിയുടെ വീട്ടിലേക്കെത്തിയത്​. കോൺഗ്രസ്​ നേതാക്കളായ അധീർ രഞ്​ജൻ ചൗധരി, കെ.സി. വേണുഗോപാൽ, രൺദീപ്​ സിങ്​ സുർജേവാല എന്നിവരും കൂടെയുണ്ടായിരുന്നു. വീടിനകത്തേക്ക്​ കയറി കുടുംബാംഗങ്ങളുമായി കോൺഗ്രസ്​ നേതാക്കൾ വിവരങ്ങൾ ചോദിച്ചറിഞ്ഞു.

പെൺക​​ുട്ടിയുടെ വീട്​ സന്ദർശിക്ക​ാൻ പുറപ്പെട്ട കോൺഗ്രസ്​ നേതാക്കളെ ഡൽഹി-യു.പി അതിർത്തിയിൽ ​പൊലീസ്​ തടഞ്ഞതിനെ തുടർന്ന്​ സംഘർഷമുണ്ടായിരുന്നു. പ്രതിഷേധങ്ങൾക്കൊടുവിൽ അഞ്ചുപേർക്ക്​ ഹഥറസിലേക്ക്​ പോകാൻ അനുമതി നൽകുകയായിരുന്നു.