വാരാണസി റാലിയിൽ 'ജയ്​ മാതാ ദി' മന്ത്രം ജപിച്ച്​ പ്രിയങ്ക ഗാന്ധി; ഏറ്റുവിളിച്ച്​ പ്രവർത്തകർ

ലഖ്​നോ: ഉത്ത​ർപ്രദേശിൽ പ്രധാനമന്ത്രി നരേന്ദ്രമോദിയുടെ മണ്ഡലമായ വാരാണസിയിൽ കിസാൻ ന്യായ്​ റാലിക്കിടെ ദുർഗ ദേവിയുടെ 'ജയ്​ മാതാ ദി' മ​ന്ത്രം വിളിച്ച്​​ കോൺഗ്രസ്​ നേതാവ്​ പ്രിയങ്ക ഗാന്ധി. പ്രവർത്തകരോട്​ ഏറ്റുപറയാനും പ്രിയങ്ക നിർബന്ധിച്ചു.

താൻ ഉപവാസത്തിലാണെന്നും അതിനാൽ ദേവുസ്​തുതി ചൊല്ലാം എന്നുപറഞ്ഞായിരുന്നു ​പ്രിയങ്കയുടെ പ്രാർഥന ചൊല്ലൽ. ഉത്തർപ്രദേശിൽ കർഷകർക്ക്​ ഐക്യദാർഢ്യം പ്രഖ്യാപിച്ചായിരുന്നു കിസാൻ ന്യായ്​ റാലി.

സംസ്​കൃതത്തിൽ രണ്ടു ശ്ലോകം ചൊല്ലുകയും ജയ്​ മാതാ ദി മന്ത്രം ജപിക്കുകയും ചെയ്​തു. ഇതോടെ പ്രവർത്തകരും മന്ത്രം ഏറ്റുപറയുകയായിരുന്നു. ജയ്​ മാതാ ദി എന്ന വാക്കുകളോടെയാണ്​ പ്രസംഗം അവസാനിപ്പിച്ചതും. കൂടാതെ എല്ലാവർക്കും ദുർഗ പൂജ ആശംസകളും അവർ നേർന്നു.

ബി.ജെ.പിയുടെ ഹിന്ദുത്വ വാദത്തിനോട്​ ഏറ്റുമുട്ടാനും ഹിന്ദുത്വം മതേതരമാണെന്ന്​ ബോധ്യപ്പെടുത്താനുമാണ്​ തങ്ങളുടെ ശ്രമമെന്ന്​ കോൺഗ്രസ്​ നേതാവ്​ സൽമാൻ ഖുർഷിദ്​ പറഞ്ഞു.

'നമ്മുടെ ഹിന്ദുത്വപ്രചാരണത്തിൽ ഹിന്ദുമതവും ഉൾക്കൊള്ളുന്നു. ഹിന്ദുമതം മതേതരമാണ്​. ഹിന്ദുമതം ഇസ്​ലാം ഉൾപ്പെടെ മറ്റു മത​ങ്ങളോട്​ കൈകോർക്കാൻ ആഗ്രഹിക്കുന്നു' -കോൺഗ്രസ്​ നേതാവ്​ പറഞ്ഞു.

ഹിന്ദുമതം ഒറ്റക്കാണെന്ന്​ അവർ പറയുന്നു. ഹിന്ദുമതം മറ്റു മതങ്ങൾക്കൊപ്പമാണെന്ന്​ ഞങ്ങൾ പറയുന്നു. സംസ്​ഥാനം ഞങ്ങൾക്ക്​ അനുകൂലമായി ചിന്തിക്കുമെന്ന കാര്യത്തിൽ ഉറപ്പുണ്ടെന്നും അദ്ദേഹം പറഞ്ഞു.