പ്രവാസിക​െള സൗജന്യമായി നാട്ടിലെത്തിക്കുന്നു; ​രാജ്യത്തെ തൊഴിലാളികളോട്​ ഇരട്ടത്താപ്പെന്ന്​ പ്രിയങ്ക ഗാന്ധി

ന്യൂഡൽഹി: രാജ്യത്തി​​​​െൻറ വിവിധ ഭാഗങ്ങളിൽ കുടുങ്ങി കിടക്കുന്ന അന്തർ സംസ്ഥാന തൊഴിലാളികളെ മടക്കി അയക്കുന്നതിനുള്ള​ ചെലവ്​ സംസ്ഥാന സർക്കാറും വഹിക്കണമെന്ന  കേന്ദ്രസർക്കാർ നടപടിയെ വിമർശിച്ച്​ കോൺഗ്രസ്​ ജനറൽ സെക്രട്ടറി പ്രിയങ്ക ഗാന്ധി. വിദേശ രാജ്യങ്ങളിൽ കുടുങ്ങിയവരെ വിമാന മാർഗം സൗജന്യമായി നാട്ടിലെത്തിക്കുന്നവർ രാജ്യത്തെ ദരിദ്രരായ തൊഴിലാളികളെ മടക്കി അയക്കാൻ പണം പിരിക്കുകയാണെന്ന്​ പ്രിയങ്ക ആരോപിച്ചു. 

രാജ്യത്തെ പടുത്തുയർത്തിയവരാണ്​ തൊഴിലാളികൾ. ഇന്നവർ പലയിടങ്ങളിലായി കുടുങ്ങിയിരിക്കുന്നു. വിമാന ചെലവ്​ വഹിച്ച്​ വിദേശത്ത്​ കുടുങ്ങിയ ഇന്ത്യക്കാരെ തിരിച്ചെത്തിക്കു​ന്നു, സർക്കാർ ഖജനാവിൽ നിന്നും 100 കോടി ചെലവഴിച്ച്​ നമസ്​തേ ട്രംപ്​ എന്ന പരിപാടി നടത്തുന്നു, റെയിൽ വേ മന്ത്രാലയം പ്രധാനമന്ത്രിയുടെ പി.എം കെയേഴ്​സ്​ ഫണ്ടിലേക്ക്​ 151 കോടി നൽകുന്നു. എന്നാൽ ഇങ്ങനൊരു മഹാമാരിക്കിടെ പാവപ്പെട്ട തൊഴിലാളികളെ സൗജന്യമായി സ്വന്തം നാടുകളിലെത്തിക്കാത്തത്​ എന്തു​ കൊണ്ടാണ്​?- പ്രിയങ്ക ട്വീറ്റ്​ ചെയ്​തു. 

ഇന്ത്യൻ നാഷനൽ കോൺഗ്രസ്​ തൊഴിലാളികളുടെ യാത്രാ ചെലവ്​ പൂർണമായി വഹിക്കുമെന്നും അവർ കൂട്ടിച്ചേർത്തു. യാത്രാ ചെലവ്​ കോൺഗ്രസ്​ വഹിക്കുമെന്ന്​ പാർട്ടി അധ്യക്ഷ സോണിയ ഗാന്ധി നേരത്തെ അറിയിച്ചിരുന്നു.