മതവികാരം വ്രണപ്പെടുത്തുന്നെന്ന്​; ആലിയ ഭട്ടിന്‍റെ പരസ്യ ചിത്രത്തിനെതിരെ ഹിന്ദുത്വ അനുകൂല സംഘടനകളുടെ പ്രതിഷേധം

മുംബൈ: ബോളിവുഡ്​ താരം ആലിയ ഭട്ട്​ അഭിനയിച്ച പരസ്യ ചിത്രത്തിനെതിരെ ഹിന്ദുത്വ അനുകൂല സംഘടനകളുടെ പ്രതിഷേധം. വിവാഹചടങ്ങായ കന്യാദാനത്തെ മോശമായി ചിത്രീകരിക്കുന്നുവെന്നും മതവികാരം വ്രണപ്പെടുത്തുന്നുവെന്നുമാണ്​ ഹിന്ദുത്വ അനുകൂല സംഘടനകളുടെ ആരോപണം.

വേദാന്ത്​ ഫാഷൻസിന്‍റെ മാന്യവാർ വസ്​ത്ര ബ്രാൻഡിന്‍റെ പരസ്യത്തിനെതിരെയാണ്​ പ്രതിഷേധം. പരസ്യചിത്രം പിൻവലിച്ച്​ മാപ്പ്​ പറയണമെന്ന്​ ആവശ്യപ്പെട്ട്​ മുംബൈയിലെ പ്രമുഖ വസ്​ത്ര ബ്രാൻഡായ മാന്യവാർ ബ്രാൻഡ്​ കമ്പനിയുടെ മുമ്പിൽ പ്രതിഷേധം സംഘടിപ്പിച്ചു.

ഹിന്ദു ജനജാഗ്രതി ​സമിതി പ്രവർത്തകർ ഷോറൂമിന്​ മുമ്പിൽ തടിച്ചുകൂടുകയും പ്ലക്കാർഡുകൾ ഉയർത്തി പ്രതിഷേധ മുദ്രാവാക്യം വിളിക്കുകയുമായിരുന്നു.

കമ്പനിയുടെ പരസ്യചിത്രം ഹിന്ദു വിവാഹചടങ്ങുകളുടെ ഭാഗമായ കന്യാദാനത്തെ തെറ്റായി ചിത്രീകരിച്ചുവെന്നും ഇത്​ മതവികാരത്തെ വ്രണപ്പെടുത്തിയെന്നും സംഘടന വക്താവ്​ ഡോ. ഉദയ്​ ധൂരി പറഞ്ഞു. കമ്പനി പരസ്യം പിൻവലിച്ച്​ മാപ്പ്​ പറയുന്നതുവരെ വസ്​ത്ര ബ്രാൻഡ്​ ബഹിഷ്​കരിക്കണമെന്നാണ്​ സംഘടനയുടെ ആഹ്വാനം.

'കന്യാദാൻ' സ​മ്പ്രദായത്തോട്​ യോജിക്കാത്ത 'കന്യാമാൻ' സ​മ്പ്രദായമാണ്​ വേണ്ടതെന്ന്​ ഉന്നയിക്കുന്ന വധുവിനെയാണ്​ ആലിയ പരസ്യത്തിൽ അവതരിപ്പിക്കുന്നത്​. പരസ്യത്തി​ന്​ മികച്ച പ്രതികരണമാണ്​ സമൂഹമാധ്യമങ്ങളിലടക്കം ലഭിച്ചത്​. അതേസമയം, ബോളിവുഡ്​ താരം കങ്കണ റണാവത്ത്​ അടക്കം പരസ്യ ചിത്രത്തിനെതിരെ രംഗത്തെത്തിയിരുന്നു.