നിയമങ്ങൾ പാർലമെന്‍റിൽ പിൻവലിക്കുന്നതു വരെ സമരം തുടരുമെന്ന്​ രാകേഷ്​ ടികായത്ത്​

കർഷക ദ്രോഹ നിർദേശങ്ങളടങ്ങിയ മൂന്ന്​ കാർഷിക നിയമങ്ങളും പാർല​മെന്‍റിൽ പിൻവലിക്കുന്നത്​ വരെ സമരം തുടരുമെന്ന്​ സമര സമിതിയുടെ നേതാവ്​ രാകേഷ്​ ടികായത്ത്​. വിവാദ കാർഷിക നിയമങ്ങൾ പിൻവലിക്കാമെന്ന പ്രധാനമന്ത്രിയുടെ പ്രഖ്യാപനത്തോട്​ പ്രതികരിക്കുകയായിരുന്നു ഭാരതീയ കിസാൻ യൂണിയൻ നേതാവ്​ രാകേഷ്​ ടികായത്ത്​.

സിഖ്​ ഗുരു ഗുരുനാനാകിന്‍റെ ജൻമദിനത്തിൽ രാജ്യത്തെ അഭിസംബോധനം ചെയ്​തു കൊണ്ടാണ്​ കാർഷിക നിയമങ്ങൾ പിൻവലിക്കാമെന്ന്​ പ്രധാനമന്ത്രി മോദി പ്രഖ്യാപിച്ചത്​. കർഷകർ സമരത്തിൽ നിന്ന്​ പിൻമാറണമെന്നും പ്രധാനമന്ത്രി ആവശ്യപ്പെട്ടിരുന്നു.

വെറും പ്രഖ്യാപനത്തിനപ്പുറത്ത്​ നടപടികൾ പൂർത്തിയാക്കിയാൽ മാത്രമേ സമരം പിൻവലിക്കൂ എന്ന നിലപാടിലാണ്​ കർഷകരിപ്പോൾ. സമരം ഉടനെ അവസാനിപ്പിക്കില്ലെന്നും പാർലമെന്‍റിൽ നിയമങ്ങൾ പിൻവലിക്കുന്നതു വരെ സമരം തുടരുമെന്നുമാണ്​ കർഷക നേതാവ്​ രാകേഷ്​ ടികായത്ത്​ അറിയിച്ചത്​.

ഒരു വർഷത്തിലേറെ നീണ്ട കർഷ സമരത്തിൽ 750 ഒാളം കർഷകരുടെ ജീവൻ നഷ്​ടമായിട്ടുണ്ടെന്നാണ്​ ഇതുവരെയുള്ള കണക്ക്​. ജനവികാരം എതിരാകുന്നെന്ന തിരിച്ചറിവിലാണ്​ കേന്ദ്ര സർക്കാർ സമരം പിൻവലിക്കാൻ തയാറായത്​. ഉപതെരഞ്ഞെടുപ്പുകളിലെ തോൽവിയും അഞ്ച്​ സംസ്​ഥാനങ്ങളിൽ വരാനിരിക്കുന്ന നിയമസഭ തെരഞ്ഞെടുപ്പുകളും മുന്നിൽ കണ്ടാണ്​ മുട്ടുമടക്കാൻ മോദി സർക്കാർ തയാറായത്​.

ജനരോഷം ശമിച്ചാൽ കാർഷിക നിയമങ്ങൾ പിൻവലിക്കാമെന്ന വാഗ്​ദാനത്തിൽ സർക്കാർ വെള്ളം ചേർക്കുമെന്ന ആശങ്ക കർഷകർക്കുണ്ട്​. പാർലമെന്‍റ്​ പാസാക്കി നിയമമായ സ്​ഥിതിക്ക്​ നടപടിക്രമങ്ങൾ പാലിച്ചു വേണം അതു പിൻവലിക്കാൻ. നടപടി ക്രമങ്ങൾ പൂർത്തിയാക്കുന്നതു വരെ സമരം തുടരാനും സമ്മർദം നില നിർത്താനുമാണ്​ കർഷകർ പറയുന്നത്​.