അർണബിനെതിരേ അന്വേഷണം ആവശ്യ​െപ്പട്ട് പുൽവാമ രക്​തസാക്ഷികളുടെ ബന്ധുക്കൾ

ടി.വി അവതാരകൻ അർണബ്​ ഗോസ്വാമിയും ടെലിവിഷൻ റേറ്റിങ്​ കമ്പനിയായ ബാർക്​ സി.ഇ.ഒയ​ും തമ്മിലുള്ള വാട്​സ്​ആപ്പ്​ ചാറ്റുകളിൽ അന്വേഷണം ആവശ്യപ്പെട്ട്​ പുൽവാമ രക്​തസാക്ഷികളുടെ ബന്ധുക്കൾ. വാട്​സാപ്പ്​ ചാറ്റുകളിൽ പുൽവാമയിൽ നടന്ന രാജ്യത്തിനെതിരായ ഭീകരാക്രമണത്തിൽ സന്തോഷം പ്രകടിപ്പിച്ച്​​ അർണബ്​ രംഗത്തെത്തിയതോടെയാണ്​ സൈനികരുടെ ബന്ധുക്കൾ അന്വേഷണം ആവശ്യപ്പെട്ടത്​. പുൽവാമ ഭീകരാക്രമണത്തെകുറിച്ച്​ 'വലിയ വിജയം' എന്നാണ്​ ബാർക് മുൻ ചീഫ് എക്സിക്യൂട്ടീവ് ഓഫീസർ പാർത്തോ ദാസ്ഗുപ്തയോട്​ അർണബ്​ പറയുന്നത്​. 'നമ്മൾ ഇത്തവണ വിജയിക്കും' എന്നും പുൽവാമ ആക്രമണം അറിഞ്ഞ അർണബ്​ ആവേശത്തോടെ പ്രതികരിക്കുന്നുണ്ട്​.

ചാവേർ ബോംബർ ഓടിച്ച കാർ സൈന്യം സഞ്ചരിച്ച ബസ്സിലേക്ക് ഇടിച്ചുകയറ്റിയുണ്ടായ സ്​ഫോടനത്തിൽ 40 പട്ടാളക്കാരാണ്​ വീരമൃത്യുവരിച്ചത്​. പുൽവാമക്ക്​ തിരിച്ചടിയായി ഇന്ത്യൻ സൈന്യം രഹസ്യമായി നടത്തിയ ബാലാക്കോട്ട്​ ആക്രമണം മൂന്ന്​ ദിവസംമുമ്പുതന്നെ അർണബ്​ അറിഞ്ഞിരുന്നതായും ചാറ്റുകൾ സൂചിപ്പിക്കുന്നു. ബാലകോട്ട് ആക്രമണത്തിന് മൂന്ന് ദിവസം മുമ്പ് വാട്‌സ്ആപ്പ് ചാറ്റിൽ 'വലിയ എന്തെങ്കിലും സംഭവിക്കും' എന്ന് അർണബ് പറയുന്നുണ്ട്​. 'സാധാരണ ഉള്ളതിനേക്കാൾ വലുത്​ സംഭവിക്കും' എന്നാണ്​ അർണബ്​ പാർത്തോദാസിനോട്​ പറയുന്നത്​. 2019 ഫെബ്രുവരി 23ന് നടന്ന വാട്​സാപ്പ് ചാറ്റിലാണിത്​ പറയുന്നത്​.

മൂന്ന് ദിവസത്തിന് ശേഷം, 2019 ഫെബ്രുവരി 26 ന് ഇന്ത്യൻ വ്യോമസേന പാകിസ്താൻ പട്ടണമായ ബാലകോട്ടിൽ ജയ്ഷെ മുഹമ്മദ് പരിശീലന ക്യാമ്പിനുനേരേ ആക്രമണം നടത്തി. അർബണിന്‍റെ ചാറ്റിനെപറ്റി മാധ്യമങ്ങളിലൂടെയാണ്​ അറിഞ്ഞതെന്നും വളരെയേറെ മനുഷ്യത്വരഹിതമാണ്​ ഇത്തരം പ്രതികരണങ്ങളെന്നും പുൽവാമ രക്​തസാക്ഷിയുടെ മകൾ അപൂവ്വ റാവത്ത്​ പറഞ്ഞു. ദേശീയസുരക്ഷയെ പരിഹസിക്കുന്ന സംഭവങ്ങളാണ്​ രാജ്യത്ത്​ നടക്കുന്നതെന്നും ബാലാക്കോട്ടിനെപറ്റി ഒരു മാധ്യമപ്രവർത്തകൻ നേരത്തേ അറിഞ്ഞു എന്നത്​ ഞെട്ടിപ്പിക്കുന്നതാണെന്നും അപൂവ്വ പറഞ്ഞു. നിങ്ങളുടെ ചാനലിന്‍റെ ടി.ആർ.പി വർധിപ്പിക്കുന്നതിനുവേണ്ടി 40 സൈനികരുടെ മരണം ഉപയോഗിക്കുന്നതിനേക്കാൾ വലിയ മനുഷ്യത്വരഹിതമായ സംഗതി ഒന്നുമില്ലെന്നും അപൂർവ്വ പറഞ്ഞു.

രാജ്യത്തെ വീര സൈനികരുടെ മരണം തന്‍റെ ചാനലിന്‍റെ റേറ്റിങ്​ വർധിപ്പിക്കുന്നതിനുള്ള മാർഗമായി കണ്ട അർണബിന്​ നാണമുണ്ടോ എന്ന്​ രക്​തസാക്ഷിയായ സൈനികന്‍റെ ഭാര്യാ മാതാവ്​ സുബൈദ ബീഗം പ്രതികരിച്ചു. മരിച്ച സൈനികൻ കുൽദീപ്​ റാട്ടിയുടെ സഹോദരൻ പ്രതാപ്​ റാട്ടി സംഭവത്തിൽ അന്വേഷണം വേണമെന്ന്​ ആവശ്യ​െപ്പട്ടു. ഒന്നുകിൽ അർണബിന്​ രാജ്യവിരുദ്ധ ശക്​തികളുമായി ബന്ധമുണ്ട്​, അല്ലെങ്കിൽ രാജ്യത്തെ ഉന്നതർ വിവരം ചോർത്തി നൽകി. രണ്ടാണെങ്കിലും ഗുരുതരമായ സംഗതിയാണെന്നും പ്രതാപ് പറഞ്ഞു.