സിറം ഇൻസ്റ്റിറ്റ്യൂട്ടിലെ തീപിടിത്തത്തിൽ ആയിരം​ കോടി രൂപയുടെ നഷ്​ടം;​ കോവിഷീൽഡ്​ വിതരണത്തെ ബാധിക്കില്ല

മുംബൈ: പുനെ മാഞ്ചരിയിലെ സിറം ഇൻസ്റ്റിറ്റ്യൂട്ടിലുണ്ടായ തീപിടിത്തത്തിൽ ആയിരം കോടി രൂപയുടെ നഷ്​ടം കണക്കാക്കുന്നെന്ന്​ സി.ഇ.ഒ അദാർ പൂനവാല. ആയിരം കോടി മൂല്യംവരുന്ന ഉപകരണങ്ങളും ഉത്പന്നങ്ങളുമാണ്​ കത്തിനശിച്ചത്​.

തീപിടിത്തം കൊറോണ പ്രതിരോധ വാക്‌സിനായ കോവിഷീല്‍ഡിന്‍റെ വിതരണത്തെ ബാധിക്കില്ലെന്ന് അദ്ദേഹം വാർത്താസമ്മേളനത്തിൽ വ്യക്​തമാക്കി. തീപിടിത്തത്തില്‍ കോവിഷീല്‍ഡ് വാക്‌സിനുകള്‍ക്ക് കേടുപാടുണ്ടായിട്ടില്ല. വാക്​സിൻ നിര്‍മിച്ച് സൂക്ഷിച്ചിരുന്നിടത്ത് ഒരു കുഴപ്പവും സംഭവിച്ചിട്ടില്ലെന്നും അദ്ദേഹം പറഞ്ഞു. കോവിഷീല്‍ഡ് നിർമാണ യൂനിറ്റില്‍ നിന്ന് ഒരു കിലോമീറ്റര്‍ അകലെയുളള കെട്ടിടത്തിലാണ് തീപിടിത്തമുണ്ടായത്.

അതേസമയം, തീപിടിത്തത്തിൽ ബി.സി.ജി, റോട്ട വൈറസ് പ്ലാന്‍റുകൾ നശിച്ചു. ഭാവിയില്‍ ബി.സി.ജി., റോട്ടാവൈറസ് വാക്‌സിനുകള്‍ ഉത്പാദിപ്പിക്കാന്‍ ലക്ഷ്യമിട്ടായിരുന്നു ഈ കെട്ടിടത്തിന്‍റെ നിര്‍മാണം. അവിടെ വാക്‌സിനുകള്‍ ഉത്പാദിപ്പിച്ചിരുന്നില്ല. അതിനാല്‍ വാക്‌സിനുകള്‍ ഒന്നും നശിച്ചു പോയിട്ടില്ലെന്നും അദ്ദേഹം വ്യക്​തമാക്കി.

മഹാരാഷ്ട്ര മുഖ്യമന്ത്രി ഉദ്ധവ് താക്കറെയും വാർത്താസമ്മേളനത്തിൽ പ​ങ്കെടുത്തു. അശ്രദ്ധയാണോ അപകടകാരണമെന്ന ചോദ്യത്തിന് അന്വേഷണം പുരോഗമിച്ചു കൊണ്ടിരിക്കുകയാണെന്നും അന്വേഷണം പൂര്‍ത്തിയാകുന്നതിനു മുന്‍പ് പ്രതികരിക്കാനാവില്ലെന്നുമായിരുന്നു ഉദ്ദവ്​ താക്കറെയുടെ മറുപടി.

വ്യാഴാഴ്ച ഉച്ചകഴിഞ്ഞ് 2.45നാണ് സിറം ഇന്‍സ്റ്റിറ്റ്യൂട്ടിൽ തീപിടിത്തമുണ്ടായത്. 100 ഏക്കറിലുള്ള കാമ്പസിൽ റോട്ട വൈറസ് വാക്സിൻ നിർമിക്കുന്ന യൂനിറ്റിലെ കെട്ടിടത്തിന്‍റെ 4,5 നിലകളിലാണ് തീപിടിച്ചത്​. അഞ്ചു പേർ മരിച്ചു. 9 പേരെ രക്ഷപ്പെടുത്തി. അപടകത്തില്‍ മരിച്ചവര്‍ക്ക് കമ്പനി 25 ലക്ഷം രൂപ നഷ്ടപരിഹാരം പ്രഖ്യാപിച്ചിട്ടുണ്ട്.