സത്​ലജ്​-യമുന കനാൽ നിർമിച്ചാൽ പഞ്ചാബ്​ കത്തും; കേന്ദ്രത്തോട്​ അമരീന്ദർ സിങ്​

ന്യൂഡൽഹി: സത്​ലജ്​-യമുന കനാൽ നിർമാണം പൂർത്തീകരിച്ചാൽ പഞ്ചാബ്​ കത്തുമെന്ന്​ മുഖ്യമന്ത്രി അമരീന്ദർ സിങ്​. പഞ്ചാബും ഹരിയാനയും തമ്മിൽ ജലം പങ്കുവെക്കുന്നത്​ സംബന്ധിച്ചുള്ള തർക്കം ദേശീയ സുരക്ഷാ പ്രശ്​നമായി മാറുമെന്നും പഞ്ചാബ്​ മുഖ്യമന്ത്രി മുന്നറിയിപ്പ്​ നൽകി. കേന്ദ്ര മന്ത്രി ഗജേന്ദ്ര സിങ്​​ ശെഖാവത്തും ഹരിയാന മുഖ്യമന്ത്രി മനോഹർ ലാൽ ഖട്ടറും പ​ങ്കെടുത്ത ഓൺലൈൻ യോഗത്തിലാണ്​ അമരീന്ദർ സിങ്​ ഇക്കാ​ര്യം പറഞ്ഞത്​.

''നിങ്ങൾ ഇക്കാര്യം ദേശീയ സുരക്ഷയുമായി ബന്ധപ്പെടുത്തി നോക്കിക്കാണണം. സത്​ലജ്​-യമുന ലിങ്ക്​ കനാലുമായി പോകാൻ നിങ്ങൾ തീരുമാനിച്ചാൽ പഞ്ചാബ്​ കത്തും. അതൊരു ദേശീയ പ്രശ്​നമായി മാറും. ഹരിയാനയും രാജസ്ഥാനുമെല്ലാം അതിൻെറ അനന്തര ഫലം അനുഭവിക്കും.​ '' - അമരീന്ദർ സിങ്​ പറഞ്ഞു.

ജലലഭ്യത സമയക്രമത്തിനനുസരിച്ച്​ പരിശോധിക്കുവാൻ ഒരു ട്രിബ്യൂണൽ വേണമെന്ന ആവശ്യം അദ്ദേഹം യോഗത്തിൽ ആവർത്തിച്ചു. ''ഞങ്ങളു​ടെ പക്കൽ ജലമുണ്ടെങ്കിൽ ഞാൻ എന്തിന്​ അത്​ നൽകാൻ വിസമ്മതിക്കണം''? അദ്ദേഹം ചോദിച്ചു. ഈ വിഷയവുമായി ബന്ധപ്പെട്ട്​ ഹരിയാന മുഖ്യമന്ത്രിയുമായി ചർച്ചക്ക്​ തയാറാണെന്നും അമരീന്ദർ സിങ്​ പറഞ്ഞു.

പതിറ്റാണ്ടുകൾ നീണ്ട സത്​ലജ്​-യമുന കനാൽ നിർമാണം പൂർത്തീകരിക്കുന്നത്​ സംബന്ധിച്ച്​ ചർച്ച ചെയ്യണമെന്ന്​ കഴിഞ്ഞ മാസം സുപ്രീംകോടതി ഇരു സംസ്ഥാനങ്ങളുടെയും മുഖ്യമന്ത്രിമാർക്ക്​ നിർദേശം നൽകിയിരുന്നു. ഇതു പ്രകാരമാണ്​ കനാലുമായി ബന്ധപ്പെട്ട്​ യോഗം നടന്നത്​.

1966ലാണ് പഞ്ചാബ്​, ഹരിയാന സംസ്ഥാനങ്ങൾ ​ ജല തർക്കമുണ്ടാവുന്നത്​. ഹരിയാന വലിയ അളവിൽ നദീജലം ആവശ്യപ്പെട്ടു. എന്നാൽ അത്​ നൽകാൻ പഞ്ചാബ്​ തയാറായില്ല. അധിക ജലം ഇല്ലെന്നായിരുന്നു പഞ്ചാബിൻെറ വിശദീകരണം. തുടർന്ന്​ 1975ൽ ഇന്ദിര ഗാന്ധി സർക്കാർ ഒരു എക്​സിക്യൂട്ടീവ്​ ഓർഡർ വഴി നദീജലം ഇരു സംസ്ഥാനങ്ങൾക്കുമായി വീതം വെച്ചു. ജലം പങ്കുവെക്കാനായി കനാൽ കമീഷൻ ചെയ്​തു.

1982ൽ കനാലിൻെറ നിർമാണം തുടങ്ങി. ഇതിനെതിരെ ശിരോമണി അകാലിദളിൻെറ നേതൃത്വത്തിൽ വൻ പ്രതിഷേധം അരങ്ങേറി. തുടർന്ന്​ 1985ൽ അന്നത്തെ പ്രധാനമന്ത്രി രാജീവ്​ ഗാന്ധി ശിരോമണി അകാലിദൾ നേതാവ്​ ഹർചന്ദ്​ സിങ്​ ലോ​​ങ്കോവാളുമായി ചർച്ച നടത്തുകയും കനാൽ വിഷയത്തിൽ ഒരു ട്രിബ്യൂണൽ സ്ഥാപിക്കാമെന്ന ഉടമ്പടിയിൽ ഒപ്പു വെക്കുകയും ചെയ്​തു. ഉടമ്പടി ഒപ്പു വെച്ച്​ ഒരു മാസം തികയുന്നതിന്​ മുമ്പ്​ ലോ​ങ്കോവാൾ തീവ്രവാദികളാൽ കൊല്ലപ്പെട്ടു.

1990ൽ, കനാലുമായി ബന്ധപ്പെട്ട്​ പ്രവർത്തിച്ച ചീഫ്​ എഞ്ചിനീയർ എം.എൽ. സേക്രി, സൂപ്രണ്ട്​ എഞ്ചിനീയർ അവതാർ സിങ്​ ഔലഖ്​ എന്നിവരും തീവ്രവാദികളുടെ കൈകളാൽ കൊല്ലപ്പെട്ടു.