സിദ്ദു പഞ്ചാബ്​ കോൺഗ്രസിലെ രാഖി സാവന്തെന്ന്​ എ.എ.പി നേതാവ്​ രാഘവ്​ ഛദ്ദ; പ്രതിഷേധം

ന്യൂഡൽഹി: പഞ്ചാബ്​ രാഷ്​ട്രീയത്തിലെ രാഖി സാവന്താണ്​ നവജ്യോത്​ സിങ്​ സിദ്ദുവെന്ന്​ ആംആദ്​മി പാർട്ടി നേതാവ്​ രാഘഖ്​ ഛദ്ദ. കാർഷിക നിയമങ്ങളിൽ ഡൽഹി സർക്കാറി​നെയും അരവിന്ദ്​ കെജ്​രിവാളിനെയും വിമർശിച്ച്​ പഞ്ചാബ്​ കോൺഗ്രസ്​ തലവൻ വിഡിയോ പുറത്തിറക്കിയതി​ന്​ പിന്നാലെയാണ്​ രാഘവിന്‍റെ പ്രതികരണം.

താങ്ങുവില നിർണയിച്ച വിളകൾക്ക്​ പോലും സ്വകാര്യ മണ്ഡികളിൽ കുറഞ്ഞ വില നിർണയിക്കുകയും കർഷകരെ ചൂഷണം ചെയ്യുകയും ചെയ്യുന്നുവെന്നായിരുന്നു അരവിന്ദ്​ കെജ്​രിവാളിനെതിരായ സിദ്ദുവിന്‍റെ വിമർശനം.

എന്നാൽ, പഞ്ചാബ്​ രാഷ്​​്ട്രീയത്തിലെ രാഖി സാവന്താണ്​ നവജ്യോത്​ സിങ്​ സിദ്ദു. മുഖ്യമന്ത്രി ക്യാപ്​റ്റൻ അമരീന്ദർ സിങ്ങിനെതിരായ പരാമർശങ്ങളിൽ ഹൈക്കമാൻഡിൽ നിന്ന്​ ശാസന ലഭിച്ചു. അതിനാൽ ഇന്ന്​ ഒരു മാറ്റത്തിന്​ അരവിന്ദ്​ കെജ്​രിവാളിനെ വിമർശിക്കാൻ ശ്രമിച്ചുവെന്നായിരുന്നു രാഘവിന്‍റെ പ്രതികരണം.

രാഘവിന്‍റെ പ്രതികരണത്തിന്​ മറുപടിയുമായി സിദ്ദു മറ്റൊരു ട്വീറ്റുമായി രംഗത്തെത്തി. 'മനുഷ്യൻ കുരങ്ങുകളിൽനിന്നാണ്​ മനുഷ്യൻ പരിണമിച്ചതെന്നാണ്​ പറയുക. എന്നാൽ രാഘവ്​ ഛദ്ദ നിങ്ങളുടെ മനസിലേക്ക്​ നോക്കൂ. ഞാൻ വിശ്വസിക്കുന്നു നിങ്ങൾ ഇപ്പോഴും പരിണാമ ഘട്ടത്തിലാണ്​. ഇപ്പോഴും നിങ്ങളുടെ സർക്കാറിന്‍റെ കാർഷിക നിയമങ്ങളെ സംബന്ധിച്ച എന്‍റെ സംശയങ്ങൾക്ക്​ നിങ്ങൾ മറുപടി നൽകിയിട്ടില്ല' -എന്നായിരുന്നു സിദ്ദുവിന്‍റെ മറുപടി.

അതേസമയം, രാഖി സാവന്തിനെ അനാവശ്യമായി ഇവരുടെ പ്രതികരണത്തിലേക്ക്​ വലിച്ചിഴച്ചതിനെതിരെ നെറ്റിസൺസും നിരവധി കോൺഗ്രസ്​ നേതാക്കളും പ്രതികരണവുമായെത്തി. സ്​ത്രീത്വത്തെ അപമാനിക്കുന്നതാണ്​ ഛദ്ദയുടെ പരാമർശമെന്നായിരുന്നു നെറ്റിസൺസിന്‍റെ അഭിപ്രായം. ഒരു രാഷ്​ട്രീയ വാക്​പോരിൽ അനാവശ്യമായി ഒരു സ്​ത്രീയുടെ പേര്​ വലിച്ചിഴച്ചതിനെതിരെ കോൺഗ്രസ്​ നേതാവ്​ അൽക്ക ലാംബ രംഗത്തെത്തി. സ്​ത്രീകളോടുള്ള എ.എ.പിയുടെ മാനസികാവസ്​ഥയാണ്​ ഇത്​ വിവരിക്കുന്നതെന്നായിരുന്നു​ അൽക്ക ലാംബയുടെ പ്രതികരണം.