കത്തെഴുതിയവർ ബി.ജെ.പിയുമായി കൂട്ടുകൂടുന്നവരെന്ന്​ രാഹുൽ കുറ്റപ്പെടുത്തിയതായി റിപ്പോർട്ട്​

ഡൽഹി: കോൺഗ്രസ്​ വർക്കിങ്​​ കമ്മിറ്റി യോഗത്തിൽ രാഹുൽ ഗാന്ധി രോഷാകുലനായതായി റിപ്പോർട്ട്​. ദിവസങ്ങൾക്ക്​ മുമ്പ്​ മുതിർന്ന നേതാക്കൾ പാർട്ടി നേതൃത്വത്തിന്​ എഴുതിയ കത്താണ്​ രാഹുലിനെ പ്രകോപിപ്പിച്ചത്​. കത്തിൽ ഒപ്പിട്ടവർ ബി.ജെ.പിയുമായി സഹകരിക്കുന്നെന്ന ആരോപണവും രാഹുൽ ഉന്നയിച്ചതായി എൻ.ഡി.ടി.വി റിപ്പോർട്ട്​ ചെയ്​തു​. കത്ത്​ എഴുതിയ സമയം ഉചിതമായി​െല്ലന്നും നിലവിലെ ​പ്രസിഡൻറ്​ സോണിയ ഗാന്ധിയുടെ ആരോഗ്യനില നേതാക്കൾ പരിഗണിച്ചില്ലെന്നും രാഹുൽ പറഞ്ഞു.

കത്തയച്ചവരെ വിമതർ എന്നാണ്​ രാഹുൽ യോഗത്തിൽ വിശേഷിപ്പിച്ചത്​. കോൺഗ്രസ്​ പ്രതിസന്ധയിൽ അകപ്പെട്ടപ്പോഴാണ്​ കത്ത്​ അയച്ചിരിക്കുന്നത്​. രാജസ്​ഥാനിലും മധ്യപ്രദേശിലും നിലനിൽപ്പിനായുള്ള പോരാട്ടത്തിലായിരുന്നു പാർട്ടി. സോണിയഗാന്ധിയാക​െട്ട രോഗക്കിടക്കയിലും. കത്ത്​ ആർക്കുവേണ്ടിയാണ്​ എഴുതിയതെന്നും അദ്ദേഹം ചോദിച്ചു. നേതാക്കളുടെ നീക്കം സോണിയയെ വേദനിപ്പിച്ചെന്നും അദ്ദേഹം പറഞ്ഞു.

എം‌.പിമാരും മുൻ കേന്ദ്രമന്ത്രിമാരും ഉൾപ്പെടെ 26 ഉന്നത കോൺഗ്രസ് നേതാക്കളാണ്​ കത്ത്​ എഴുതിയത്​. കോൺഗ്രസിന്​ മുഴുവൻ സമയ പ്രസിഡൻറ്​ വേണമെന്നായിരുന്നു കത്തിലെ പ്രധാന ആവശ്യം. നേതൃത്വത്തെക്കുറിച്ചുള്ള അനിശ്ചിതത്വം പ്രവർത്തകരിൽ ആശങ്ക ഉണർത്തുന്നുണ്ടെന്നും കത്തിൽ പറഞ്ഞിരുന്നു.

കപിൽ സിബൽ, ശശി തരൂർ, ഗുലാം നബി ആസാദ്, പൃഥ്വിരാജ് ചവാൻ, വിവേക് ​​തങ്ക, ആനന്ദ് ശർമ തുടങ്ങിയ സമുന്നതരായ നേതാക്കളാണ്​ കത്തിൽ ഒപ്പിട്ടിരുന്നത്​. സോണിയ ഗാന്ധിയെയും രാഹുലിനേയും പിന്തുണച്ച് മുൻ പ്രധാനമന്ത്രി മൻ‌മോഹൻ സിങ്ങും രംഗത്തെത്തി. കത്ത് നിർഭാഗ്യകരമാണെന്ന് മുൻ പ്രധാനമന്ത്രി പറഞ്ഞു. ഹൈക്കമാൻഡിനെ ദുർബലപ്പെടുത്തുന്നത് കോൺഗ്രസിനെ ദുർബലപ്പെടുത്തുന്നതിന്​ തുല്യമാണെന്നും അദ്ദേഹം അഭിപ്രായപ്പെട്ടു.