കുസാറ്റ് ദുരന്തം ഞെട്ടിക്കുന്നത്; അനുശോചിച്ച് രാഹുൽ ഗാന്ധി

കൊച്ചി: കൊച്ചി ശാസ്ത്ര-സാ​ങ്കേതിക സർവകലാശാല ക്യാമ്പസിലുണ്ടായ തിക്കിലും തിരക്കിലും പെട്ട് നാല് പേർ മരിക്കാനിടയായ ദുരന്തം ഞെട്ടിക്കുന്നതാണെന്ന് കോൺഗ്രസ് നേതാവ് രാഹുൽ ഗാന്ധി. ഫേസ്ബുക്കിലൂടെയാണ് ദുരന്തത്തിൽ അനുശോചനമറിയിച്ച് രാഹുൽ ഗാന്ധി രംഗത്തെത്തിയത്.

കുസാറ്റിലുണ്ടായ നാലു പേരുടെ ജീവനെടുക്കുകയും നിരവധി പേർക്ക് പരിക്കേൽക്കുകയും ചെയ്ത സംഭവം ഞെട്ടിക്കുന്നതും അത്യന്തം ദുഃഖമുളവാക്കുന്നതുമാണ്. മരിച്ചവരുടെ കുടുംബങ്ങൾക്ക് എന്റെ അനുശോചനമറിയിക്കുന്നു. ദുഷ്‍കരമായ സമയത്തെ അതിജീവിക്കാൻ അവർക്ക് കരുത്തുണ്ടാകട്ടെ. പരിക്കേറ്റവർ വേഗത്തിൽ സുഖം പ്രാപിക്കട്ടെ. അവർക്ക് ഏറ്റവും മികച്ച വൈദ്യസഹായം നൽകണമെന്ന് താൻ കേരള സർക്കാറിനോട് അഭ്യർഥിക്കുന്നുവെന്നും രാഹുൽ ഗാന്ധി പറഞ്ഞു.

കളമശ്ശേരിയിലെ കൊച്ചിൻ ശാസ്ത്ര സാങ്കേതിക സർവകലാശാല കാമ്പസിൽ (കുസാറ്റ്) ടെക്ക് ഫെസ്റ്റിനിടെ തിക്കിലും തിരക്കിലുംപെട്ട് നാലു പേർ മരിച്ചിരുന്നു. ര​ണ്ടാം​വ​ർ​ഷ സി​വി​ൽ വി​ദ്യാ​ർ​ഥി എ​റ​ണാ​കു​ളം കൂ​ത്താ​ട്ടു​കു​ളം കി​ഴ​കൊ​മ്പ് കൊ​ച്ചു​പാ​റ​യി​ൽ ത​മ്പി​യു​ടെ മ​ക​ൻ അ​തു​ൽ ത​മ്പി, ര​ണ്ടാം​വ​ർ​ഷ ഇ​ല​ക്​​ട്രോ​ണി​ക്സ്​ വി​ദ്യാ​ർ​ഥി​നി പ​റ​വൂ​ർ ഗോ​തു​രു​ത്ത് കു​റു​മ്പ​ത്തു​രു​ത്ത് കോ​ണ​ത്ത് റോ​യ് ജോ​ർ​ജു​കു​ട്ടി​യു​ടെ മ​ക​ൾ ആ​ൻ റി​ഫ്​​ത്ത (20), ര​ണ്ടാം വ​ർ​ഷ ഇ​ല​ക്ട്രോ​ണി​ക്സ് ആ​ൻ​ഡ്​ ക​മ്യൂ​ണി​ക്കേ​ഷ​ൻ എ​ൻ​ജി​നീ​യ​റി​ങ് വി​ദ്യാ​ർ​ഥി​നി കോ​​ഴി​ക്കോ​ട്​ താ​മ​ര​​ശ്ശേ​രി പു​തു​പ്പാ​ടി മൈ​ലേ​ലം​പാ​റ വ​യ​ല​പ​ള്ളി​ൽ തോ​മ​സ് സ്ക​റി​യ​യു​ടെ മ​ക​ൾ സാ​റ തോ​മ​സ് (19) എന്നീ വിദ്യാർഥികളും പാലക്കാട് മുണ്ടൂർ സ്വദേശിയായ ആൽബിൻ ജോസഫുമാണ് മരിച്ചത്. നാലുപേരെയും മരിച്ച നിലയിലാണ് ആശുപത്രിയിലെത്തിച്ചത്.

ശ​നി​യാ​ഴ്ച വൈ​കീ​ട്ട് ഏ​ഴോ​ടെ​യാ​ണ് ദുരന്തമുണ്ടായത്. കു​സാ​റ്റ് സ്‌​കൂ​ള്‍ ഓ​ഫ് എ​ൻ​ജി​നീ​യ​റി​ങ്ങി​ലെ (എ​സ്.​ഒ.​ഇ) ഏ​റ്റ​വും വ​ലി​യ ആ​ഘോ​ഷ​മാ​യ ടെ​ക്‌​നി​ക്ക​ല്‍ ഫെ​സ്റ്റ് ‘ധി​ഷ​ണ’​ക്കിടെയാണ് ദുരന്തം. ‘ധി​ഷ​ണ’​യു​ടെ സ​മാ​പ​ന ദി​നത്തിതൽ ബോ​ളി​വു​ഡ് ഗാ​യി​ക നി​ഖി​ത ഗാ​ന്ധി​യു​ടെ ഗാ​ന​സ​ന്ധ്യ​യാ​ണ് ന​ട​ക്കാ​നി​രു​ന്ന​ത്. കാമ്പസിലെ ഓപൺ എയർ ഓഡിറ്റോറിയത്തിൽ സംഗീതനിശ ആരംഭിക്കുന്നതിനു തൊട്ടുമുമ്പായിരുന്നു ദുരന്തം. വൈകുന്നേരത്തോടെ വൻ ജനക്കൂട്ടമാണ് ഇവിടെ എത്തിയത്. നിരവധി കാമ്പസുകളിൽ നിന്നും വിദ്യാർഥികളടക്കം ഇവിടെ എത്തിച്ചേർന്നിരുന്നു.