കാർഷിക നിയമങ്ങളിലെ പ്രത്യാഘാതങ്ങൾ ഉയർത്തിക്കാട്ടി കോൺഗ്രസിന്‍റെ ബുക്ക്​ലെറ്റ്​; രാഹുൽ ഗാന്ധി പ്രകാശനം ചെയ്​തു

ന്യൂഡൽഹി: കേന്ദ്രസർക്കാറിന്‍റെ നിയമ നിർമാണങ്ങളിലെ പ്രത്യാഘാതം ഉയർത്തിക്കാട്ടുന്ന ബുക്ക്​ലെറ്റ്​ കോൺഗ്രസ്​ നേതാവ്​ രാഹുൽ ഗാന്ധി പുറത്തിറക്കി. കാർഷിക നിയമത്തിനെതി​രായ പ്രതിഷേധം കനക്കുന്നതിനിടെയാണ്​ കോൺഗ്രസിന്‍റെ ഐക്യദാർഢ്യം.

കേന്ദ്രസർക്കാറിന്‍റെ കാർഷിക നിയമങ്ങൾ വരുത്തിവെക്കുന്ന അപകടത്തെക്കുറിച്ചാണ്​ ബുക്ക്​ലെറ്റ്​. ഡൽഹി ആസ്​ഥാനത്ത്​ നടത്തിയ വാർത്താസമ്മേളനത്തിൽ അദ്ദേഹം ബുക്ക്​ലെറ്റ്​ പ്രകാശനം ചെയ്​തു.

'രാജ്യത്ത്​ ഒരു ദുരന്തം നടന്നുകൊണ്ടിരിക്കുകയാണ്​. സർക്കാർ പ്രശ്​നങ്ങളെ അവഗണിക്കുകയും ​രാജ്യത്തെ തെറ്റിദ്ധരിപ്പിക്കുകയും ചെയ്യുന്നു​. ഞാൻ കർഷകരെക്കുറിച്ച്​ മാത്രം സംസാരിക്കാൻ ആഗ്രഹിക്കുന്നില്ല. അവരും ദുരന്തത്തിന്‍റെ ഭാഗമാണെന്ന്​ മാത്രമേയുള്ളൂ. ഇത്​ യുവജനങ്ങൾക്ക്​ പ്രധാനമാണ്​. കാരണം ഇത്​ കഴിഞ്ഞുപോയതിനെക്കുറിച്ചല്ല, ഭാവിയെക്കുറിച്ചാണ്​' -രാഹുൽ ഗാന്ധി പറഞ്ഞു.

രാജ്യത്തെ കർഷകത്തൊഴിലാളികൾ ഭൂരിഭാഗവും എസ്​.സി/എസ്​.ടി​, ഒ.ബി.സി വിഭാഗങ്ങളാണ്​. അവരെ ഈ നിയമങ്ങൾ പ്രതികൂലമായി ബാധിക്കും. കാർഷിക നിയമങ്ങൾ കർഷകരെ എങ്ങനെ സ്വാധീനിക്കുമെന്ന്​ ഈ ബുക്ക്​ലെറ്റിലുണ്ട്​. കൂടാതെ സർക്കാറിനെയും പൊതുവിതരണ സ​മ്പ്രദായത്തെയും പുതിയ കാർഷിക നിയമങ്ങൾ എങ്ങനെ ബാധിക്കുമെന്നും ചൂണ്ടിക്കാണിക്കുന്നതായി ബുക്ക്​ലെറ്റ്​ തയാറാക്കുന്നതിൽ പങ്കാളിയായിരുന്ന നേതാവ്​ പറഞ്ഞു.

കാർഷിക നിയമങ്ങൾ പിൻവലിക്കണമെന്നാണ്​ കോൺഗ്രസിന്‍റെ ആവശ്യം. കാർഷിക നിയമങ്ങൾക്കെതിരെ 2019 നവംബറിൽ ആരംഭിച്ച സമരം ഡൽഹി അതിർത്തിയിൽ തുടരുകയാണ്​. കാർഷിക നിയമങ്ങൾ പിൻവലിക്കണമെന്നും അടിസ്​ഥാന താങ്ങുവില ഉറപ്പാക്കണമെന്നുമാണ്​ കർഷകരുടെ ആവശ്യം.