'എന്ത്​ സംഭവിച്ചാലും കരയരുതെന്ന്​ അവർ പറഞ്ഞു'; ഇന്ദിരയുടെ ചരമദിനത്തിൽ വികാരനിർഭരമായ വിഡിയോ പങ്കുവെച്ച്​ രാഹുൽ ഗാന്ധി

ന്യൂഡൽഹി: മുൻ പ്രധാനമന്ത്രി ഇന്ധിരാ ഗാന്ധിയുടെ ചരമദിനത്തിൽ വികാരനിർഭരമായ വിഡിയോ പങ്കുവെച്ച്​ കോൺഗ്രസ് നേതാവ്​ രാഹുൽ ഗാന്ധി. 1984 ഒക്​ടോബർ 31ന്​ ഇന്ദിരാ ഗാന്ധിയുടെ മൃതദേഹത്തിനരികെ രാഹുൽ പൊ​ട്ടിക്കരയുന്നത്​ വിഡിയോയിൽ കാണാം.

തനിക്ക്​ നഷ്​ടപ്പെട്ടത്​ സൂപ്പർ മോമിനെയാണെന്ന്​ മൂന്ന്​ മിനിറ്റ്​ ദൈർഘ്യമുള്ള വിഡിയോയിൽ രാഹുൽ പറയുന്നു. പിതാവ്​ രാജീവ് ഗാന്ധി ദേഷ്യപ്പെടു​േമ്പാഴെല്ലാം അവരായിരുന്നു തന്നെ സംരക്ഷിച്ചിരുന്നത്​.​ രാജീവ് ഗാന്ധിയും സോണിയ ഗാന്ധിയും ഇന്ദിരാഗാന്ധിക്ക് ആദരാഞ്ജലി അർപ്പിക്കുന്നതും വിഡിയോയിൽ കാണാം.

'അവർ (ഇന്ദിരാ ഗാന്ധി) മരിക്കുന്ന ദിവസം രാവിലെ എന്നോട് പറഞ്ഞു, തനിക്ക് എന്ത്​ സംഭവിച്ചാലും കരയരുത്. അവർ എന്താണ് ഉദ്ദേശിച്ചതെന്ന് എനിക്ക് മനസ്സിലായില്ല. 2-3 മണിക്കൂർ കഴിഞ്ഞ് അവർ മരിച്ചു. താൻ കൊല്ലപ്പെടുമെന്ന് അവർക്ക് സൂചനയുണ്ടായിരുന്നു. വീട്ടിലെ എല്ലാവർക്കും ഇത് അറിയാമായിരുന്നു'- രാഹുൽ തന്‍റെ യൂട്യൂബ് ചാനലിൽ പോസ്റ്റ് ചെയ്ത വിഡിയോയിൽ പറയുന്നു.

'ആ ദിവസം തന്‍റെ ജീവിതത്തിലെ ഏറ്റവും പ്രയാസമേറിയ രണ്ടാമത്തെ ദിനമായിരുന്നു. അവർ ഒരിക്കൽ ഞങ്ങളോട് ഡൈനിംഗ് ടേബിളിൽ വെച്ച് പറഞ്ഞു, ഒരു രോഗം ബാധിച്ച് മരിക്കുന്നതാണ് ഏറ്റവും വലിയ ശാപമെന്ന്​. അവരുടെ വീക്ഷണകോണിൽ, രാജ്യത്തിന്​ വേണ്ടി ജീവൻ വെടിയലാണ്​ മരിക്കാനുള്ള ഏറ്റവും നല്ല മാർഗം' -രാഹുൽ കൂട്ടിച്ചേർത്തു.

ഞായറാഴ്ച രാവിലെ ഇന്ദിരാഗാന്ധിയുടെ സ്മാരകമായ ശക്തിസ്ഥലിൽ രാഹുൽ ഗാന്ധി പുഷ്പാർച്ചന നടത്തി. തന്‍റെ മുത്തശ്ശി അവസാന നിമിഷം വരെ നിർഭയമായി രാജ്യത്തെ സേവിച്ചുവെന്നും അവരുടെ ജീവിതം നമുക്ക്​ പ്രചോദനമാണെന്നും രാഹുൽ ഗാന്ധി ട്വീറ്റ് ചെയ്തു.