ഗുരുതര രോഗമുള്ളവരും ഗർഭിണികളും ട്രെയിൻ യാത്ര ഒഴിവാക്കണം -റെയിൽവേ

ന്യൂഡൽഹി: ഒമ്പത്​ അന്തർ സംസ്ഥാന തൊഴിലാളികൾ ശ്രമിക്​ ട്രെയിനുകളിൽ മരിച്ചതിന്​ പിന്നാലെ യാത്രക്കാർക്ക്​​ നിർദേശവുമായി ഇന്ത്യൻ റെയിൽവേ. ഗുരുതര രോഗമുള്ളവർ, ഗർഭിണികൾ, 10 വയസിൽ താഴെയുള്ള കുട്ടികൾ, 65 വയസിന്​ മുകളിൽ പ്രായമുള്ളവർ എന്നിവർ ശ്രമിക്​ ട്രെയിനുകളിലെ യാത്ര പരമാവധി ഒഴിവാക്കണമെന്ന്​ റെയിൽവേ അറിയിച്ചു. അത്യാവശ്യ ഘട്ടങ്ങളിൽ മാത്രമേ ഇൗ വിഭാഗത്തിലുള്ളവർ ശ്രമിക് ട്രെയിനുകളിൽ യാത്ര ചെയ്യാവൂയെന്നും റെയിൽവേ വ്യക്​തമാക്കി.

രാജ്യത്തി​​െൻറ വിവിധയിടങ്ങളിൽ കുടുങ്ങിയ അന്തർ സംസ്ഥാന തൊഴിലാളികളെ നാട്ടിലെത്തിക്കുന്നതിനായാണ്​ റെയിൽവേ ശ്രമിക്​ ട്രെയിനുകൾ തുടങ്ങിയത്​. എന്നാൽ, ഗുരുതര രോഗമുള്ള പലരും ​ഇത്തരം ട്രെയിനുകളിൽ യാത്ര ചെയ്യുന്നുണ്ട്​. ഇത്​ സ്ഥിതി രൂക്ഷമാക്കു​ന്നുവെന്നാണ്​ റെയിൽവേ വിലയിരുത്തൽ. ശ്രമിക്​ ട്രെയിൻ യാത്രക്കിടെ ചിലർ മരിക്കുന്ന സാഹചര്യവുമുണ്ടായെന്നും റെയിൽവേ പുറത്തിറക്കിയ പ്രസ്​താവനയിൽ പറയുന്നു.

ഉത്തർപ്രദേശിലേക്കും ബിഹാറിലേക്കുമുള്ള ശ്രമിക്​ ട്രെയിൻ യാത്രക്കിടെ ഒമ്പത്​ അന്തർ സംസ്ഥാന തൊഴിലാളികളാണ്​ മരിച്ചത്​. അന്തരീക്ഷ താപനില ഉയരുന്നതും പട്ടിണിയും ഡിഹൈഡ്രേഷനും തൊഴിലാളികൾക്ക്​ വെല്ലുവിളിയാവുന്നുണ്ട്​. മരണങ്ങളിൽ റെയിൽവേക്കെതിരെ വിമർശനങ്ങൾ ഉയർന്നതോടെയാണ്​ പുതിയ നിർദേശം.