നീലചിത്ര നിർമാണ കേസ്​; നിർണായക സാക്ഷികളായി രാജ്​ കുന്ദ്രയുടെ നാലു ജീവനക്കാർ

മുംബൈ: സെലിബ്രിറ്റി വ്യവസായിയും ബോളിവുഡ്​ താരം ശിൽപ്പ ഷെട്ടിയുടെ ഭർത്താവുമായ രാജ്​ കുന്ദ്രക്കെതിരായ നീലചിത്ര നിർമാണ കേസിൽ പ്രധാന സാക്ഷികളാകുക നാലു ജീവനക്കാർ. കുന്ദ്രയുടെ കമ്പനിയിലെ നാലു ജീവനക്കാരുടെ സാക്ഷിമൊഴിയാണ്​ കേസിൽ നിർണായകം​.

ജൂലൈ 19നാണ്​ നീലചിത്ര നിർമാണ -വിതരണവുമായി ബന്ധ​െപ്പട്ട്​ കുന്ദ്ര അറസ്​റ്റിലാകുന്നത്​. ക്രിമിനൽ കുറ്റകൃത്യം, ഐ.ടി നിയമം തുടങ്ങിയവ പ്രകാരമായിരുന്നു അറസ്​റ്റ്​.

കുന്ദ്രയുടെ നാല്​ ജീവനക്കാരാണ്​ പ്രധാന സാക്ഷികളെന്ന്​ ക്രൈം ബ്രാഞ്ച്​ പറഞ്ഞു. രാജ്​ കുന്ദ്രയും മറ്റുള്ളവരും ​കേസിൽ സഹകരിക്കുന്നില്ലെങ്കിലും നാലു ജീവനക്കാർ നിർണായക സാക്ഷി മൊഴിയുമായി രംഗത്തെത്തുകയായിരുന്നുവെന്നും അവർ കൂട്ടിച്ചേർത്തു.

ബിസിനസ്​ ഡീലുകൾ, സാമ്പത്തിക ​സ്രോതസുകൾ, റാക്കറ്റ്​ വിവരങ്ങൾ തുടങ്ങിയവ ഇവരിൽനിന്ന്​ ലഭിച്ചതായാണ്​ വിവരം.

റാക്കറ്റി​െൻറ പ്രവർത്തനങ്ങളും വരുമാന സ്രോതസും അന്വേഷിക്കുകയാണ്​ ​ഇപ്പോൾ ക്രൈംബ്രാഞ്ച്​ സംഘം. നാലുപേരുടെയും മൊഴി മജിസ്​ട്രേറ്റിന്​ മുമ്പിൽ ഉടൻ രേഖപ്പെടുത്തിയേക്കും.

ശനിയാഴ്​ച മുംബൈ പൊലീസ്​ ക്രൈംബ്രാഞ്ച്​ അന്ദേരിയിലെ രാജ്​ കുന്ദ്രയുടെ ഓഫിസായ വിയാനിൽ പരിശോധന നടത്തിയിരുന്നു. പരിശോധനയിൽ രാജ്​ കുന്ദ്രയുടെ ഓഫിസിൽനിന്ന്​ രഹസ്യലോക്കർ കണ്ടെടുത്തതായാണ്​ വിവരം. ബിസിനസ്​, ക്രിപ്​റ്റോ കറൻസി തുടങ്ങിയവയുടെ രേഖകൾ ഇതിൽ അടങ്ങിയിരിക്കുന്നതായും പറയുന്നു. എല്ലാ ​രേഖകളും വിശദമായി പരിശോധിക്കുമെന്ന്​ പൊലീസ്​ പറഞ്ഞു.