യു-ടേണടിച്ച്​ രാജസ്​ഥാൻ സർക്കാർ; ശൈശവ വിവാഹത്തിന്​ നിയമസാധുത നൽകുന്ന നിയമദേദഗതി പിൻവലിച്ചു

ജയ്​പൂർ: ശക്​തമായ പ്രതിഷേധങ്ങളെ തുടർന്ന്​ ശൈശവ വിവാഹത്തിന്​ നിയമസാധുത നൽകുന്ന നിയമദേദഗതി രാജസ്​ഥാൻ സർക്കാർ പിൻവലിച്ചു. പ്രക്ഷോഭങ്ങൾക്കിടയിൽ കഴിഞ്ഞ മാസമാണ്​ രാജസ്ഥാൻ നിയമസഭ നിർബന്ധിത രജിസ്ട്രേഷൻ ഭേദഗതി ബിൽ-2021 പാസാക്കിയത്​. 2009 ലെ രാജസ്ഥാൻ നിർബന്ധിത വിവാഹ രജിസ്‌ട്രേഷൻ ആക്​ട്​ ഭേദഗതി ചെയ്​താണ് പുതിയ നിയമം കൊണ്ടുവന്നത്​. എന്നാൽ ഇതുവരെ പ്രാബല്യത്തിൽ വന്നിരുന്നില്ല

പുതിയ നിയമത്തിലെ സെക്ഷൻ എട്ട്​ അനുസരിച്ച്, വധൂവരന്മാർക്ക് 30 ദിവസത്തിൽ കൂടുതൽ താമസിക്കുന്ന സ്ഥലത്തെ വിവാഹ രജിസ്ട്രേഷൻ ഓഫീസർക്ക് വിവാഹ രജിസ്ട്രേഷനായി അപേക്ഷിക്കാമായിരുന്നു. 21 വയസിൽ താഴെയുള്ള വരനും 18 വയസിൽ താഴെയുള്ള വധുവും തമ്മിൽ വിവാഹം കഴിച്ചാൽ 30 ദിവസത്തിനകം അടുത്ത ബന്ധുക്കളോ രക്ഷകർത്താവോ രജിസ്​ട്രേഷൻ നിർവ്വഹിക്കണമെന്ന്​ നിയമത്തിൽ പറഞ്ഞിരുന്നു.

ഈ നിയമം ശൈശവ വിവാഹങ്ങളെ പ്രോത്സാഹിപ്പിക്കുമെന്ന് വ്യാപകമായി വിമർശനമുയർന്നു. ഒരു എൻ.ജി.ഒ നിയമ​ഭേദഗതിക്കെതിരെ രാജസ്ഥാൻ ഹൈക്കോടതിയിൽ ഹരജി നൽകി. ശക്​തമായ പ്രതിഷേധങ്ങ​ൾക്കൊടുവിൽ അന്താരാഷ്ട്ര ബാലികാദിനമായിരുന്ന തിങ്കളാഴ്ചയാണ്​ സർക്കാർ ഗവർണറോട്​ ബിൽ പിൻവലിക്കാൻ ആവശ്യപ്പെട്ടത്​.

സംസ്ഥാനത്ത് ശൈശവ വിവാഹം പൂർണമായി ഇല്ലാതാക്കുന്നതിന് ശക്തമായ ഇച്ഛാശക്തിയോടെയാണ് സർക്കാർ പ്രവർത്തിക്കുന്നതെന്ന് മുഖ്യമന്ത്രി അശോക് ഗെഹ്​ലോട്ട് പറഞ്ഞു. എല്ലാ വിവാഹങ്ങളും രജിസ്റ്റർ ചെയ്യണമെന്ന് പറയുന്ന സുപ്രീം കോടതി നിർദ്ദേശത്തെ തുടർന്നാണ്​ ബിൽ കൊണ്ടുവന്നതെന്നും ശൈശവ വിവാഹങ്ങളെക്കുറിച്ചുള്ള തെറ്റായ ധാരണ കാരണം ബിൽ തിരികെ നൽകാൻ ഞങ്ങൾ ഗവർണറോട് അഭ്യർഥിക്കുന്നതായും ഗെഹ്​ലോട്ട്​ പറഞ്ഞു.

പ്രതിപക്ഷമായ ബി.ജെ.പിയുടെ പ്രതിഷേധങ്ങള്‍ക്കും ബഹളങ്ങള്‍ക്കും ഇടയില്‍ സെപ്​റ്റംബർ 17നാണ്​ ബിൽ രാജസ്​ഥാൻ നിയമസഭ പാസാക്കിയത്​. നേരത്തെ, വിവാഹങ്ങൾ രജിസ്റ്റർ ചെയ്യാൻ ജില്ലാ വിവാഹ രജിസ്ട്രേഷൻ ഓഫീസർക്ക് (ഡി.എം.ആർ.ഒ) മാത്രമേ അധികാരമുണ്ടായിരുന്നുള്ളൂ. എന്നാൽ വിവാഹങ്ങൾ രജിസ്റ്റർ ചെയ്യുന്നതിനായി ഡി.എം.ആർ.ഒയെയും ബ്ലോക്ക് എം.ആർ.ഒയെയും നിയമിക്കാൻ സർക്കാരിനെ അധികാരപ്പെടുത്തുന്നതായിരുന്നു പുതിയ ഭേദഗതി.