35 വർഷത്തിന്​ ശേഷം പിറന്ന കൺമണി; വീട്ടിലെത്തിക്കാൻ ഹെലികോപ്​ടർ വാടകക്കെടുത്ത്​ കുടുംബം

നാഗോർ: രാജസ്​ഥാനിലെ നാഗോറിൽ 35 വർഷത്തിന്​ ശേഷം പിറന്ന പെൺകുഞ്ഞിനെ വീട്ടിലെത്തിക്കാൻ ഹെലികോപ്​ടർ വാട​കക്കെടുത്ത്​ കുടുംബം. മാർച്ച്​ മൂന്നിനാണ്​ ഹനുമാൻ പ്രജാപതിനും ഭാര്യ ചുകി ദേവിക്കും പെൺകുഞ്ഞ്​ പിറന്നത്​. കുഞ്ഞിന്​ ഇരുവരും റിയ എന്ന്​ പേരിടുകയും ചെയ്​തു.

നാഗോറിലെ ആശുപത്രിയിൽനിന്ന്​ പ്രസാവാനന്തര ശുശ്രൂഷകൾക്കായി അമ്മയെയും കുഞ്ഞിനെയും ചുകിയുടെ വീട്ടിലേക്ക്​ കൊണ്ടുപോകുകയായിരുന്നു. ഹർസോലവ്​ ഗ്രാമത്തിലാണ്​ ചുകിയുടെ വീട്​.

'എന്‍റെ മകളുടെ വരവ്​ സന്തോഷകരമാക്കാൻ എന്തും ചെയ്യുമായിരുന്നു. അതിനാൽ കുഞ്ഞിനെ ഗ്രാമത്തിലെത്തിക്കാൻ ഹെലികോപ്​ടർ യാത്ര തെരഞ്ഞെടുക്കുകയായിരുന്നു' ഹനുമാൻ പറഞ്ഞു.

നിംബ്​ഡി ചന്ദവാദ ഗ്രാമത്തിലാണ്​ ഹനുമാന്‍റെ താമസം. അവിടെനിന്ന്​ ചുകിയുടെ ഗ്രാമമായ ഹർസോലവിലേക്ക്​ 40 കിലോമീറ്ററാണ്​ ദൂരം. ഹെലികോപ്​ടറിൽ 10 മിനിറ്റുകൊണ്ട്​ അവിടെയെത്താനാകും.

ഹനുമാനും ബന്ധുക്കളായ മൂന്നുപേരും ഹെലികോപ്​ടറിൽ ആദ്യം ചുകിയുടെ ഗ്രാമത്തിലെത്തുകയായിരുന്നു. അവിടെനിന്ന്​ ഭാര്യയെയും മകളെയും കൂട്ടി നിംബ്​ഡി ഗ്രാമത്തിലേക്ക്​ തിരിച്ചു.

കുടുംബത്തിൽ 35 വർഷത്തിന്​ ശേഷം പെൺകുഞ്ഞ്​ ജനിച്ചത്​ ആഘോഷമാക്കുന്നതിന്​ പിതാവ്​ മദൻലാൽ കുംഹാറാണ്​ ഈ ഐഡിയ പറഞ്ഞതെന്ന്​ ഹനുമാൻ പ്രജാപത്​ പറഞ്ഞു.

'സാധാരണ പെൺകുട്ടികളുടെ ജനനം ആരും ആഘോഷിച്ച്​ കാണാറില്ല. എന്നാൽ ഞങ്ങൾക്ക്​ പെൺകുട്ടിയും ആൺകുട്ടിയും തമ്മിൽ യാതൊരു വ്യത്യാസവുമില്ല. ഞാൻ മകളെ പഠിപ്പിക്കുകയും അവളുടെ സ്വപ്​നങ്ങൾ സാക്ഷാത്​കരിക്കുകയും ചെയ്യും' -പ്രജാപത്​ പറഞ്ഞു.