രമൺസിങ്​ സർക്കാറിനെതിരായ അവിശ്വാസപ്രമേയം പരാജയം

റായ്​പൂർ: ഛത്തിസ്​ഗഢിൽ രമൺ സിങ്ങി​​െൻറ നേതൃത്വത്തിലുള്ള ബി.ജെ.പി സർക്കാറിനെതിരെ കോൺഗ്രസ്​ കൊണ്ടുവന്ന അവിശ്വാസ​പ്രമേയം പരാജയപ്പെട്ടു. 14 മണിക്കൂർ നീണ്ട ചർച്ചകൾക്കൊടുവിൽ നടന്ന ശബ്​ദവോ​​െട്ടടുപ്പിലൂടെയാണ്​ പ്രമേയം തള്ളിയത്​. വെള്ളിയാ​ഴ്​ച ഉച്ചക്ക്​ 12ന്​ തുടങ്ങിയ ചർച്ച പൂർത്തിയായത്​ ശനിയാഴ്​ച പുലർച്ചെ 2.10ന്​.  

അഴിമതി, ക്രമസമാധാനപ്രശ്​നം, അസെക്​സ്​ സീഡി കേസ്​ അടക്കം വിവിധ ആരോപണങ്ങൾ ഉന്നയിച്ചാണ്​ കോൺഗ്രസ്​ അവിശ്വാസപ്രമേയത്തിന്​ അനുമതി തേടിയത്​. ആരോപണങ്ങൾ അടിസ്​ഥാനരഹിതമാണെന്നും ദിശാബോധമില്ലാത്തതാണെന്നും മുഖ്യമന്ത്രി രമൺസിങ്​ ആണയിട്ടു. 15 വർഷമായി മികച്ചൊരു പ്രതിപക്ഷമാകാൻപോലും കഴിയാത്തതാണ്​ കോൺഗ്രസി​​െൻറ ദുര്യോഗം.  ഒരു തെളിവുമില്ലാതെ വായിൽ തോന്നിയത്​ കോതക്ക്​ പാട്ട്​ എന്ന മട്ടിലാണ്​ പ്രതിപക്ഷത്തി​​െൻറ ആരോപണമെന്നും അദ്ദേഹം വിമർശിച്ചു. സർക്കാറി​​െൻറ നേട്ടങ്ങൾ അക്കമിട്ടു നിരത്തിയശേഷം ബി.ജെ.പി അധികാരം നിലനിർത്തുമെന്ന്​ അദ്ദേഹം പറഞ്ഞു.

രമൺസിങ്​​ സർക്കാർ മൂന്നാമത്തെ അവിശ്വാസമാണ്​ അതിജീവിക്കുന്നത്​. 2003 മുതൽ ഇവിടെ അധികാ​രം കൈയാളുന്ന ബി.ജെ.പി ഇൗ വർഷം അവസാനം നടക്കുന്ന നിയമസഭ തെരഞ്ഞെടുപ്പിനുള്ള ഒരുക്കത്തിലാണ്​.