അതിജീവിതയെ കൊലപ്പെടുത്താൻ ശ്രമം; ബലാത്സം​ഗക്കേസ് പ്രതിക്കും സഹായികൾക്കുമെതിരെ കേസ്

ജയ്പൂർ: ബലാത്സം​ഗ അതിജീവിതയെ കൊലപ്പെടുത്താൻ ശ്രമിച്ച സംഭവത്തിൽ ബലാത്സം​​ഗക്കേസ് പ്രതിയുടെ സഹായികളും പിടിയിൽ. കേസിലെ മുഖ്യമപ്രതിയായ രാജേന്ദ്ര യാദവിനായുള്ള തെരച്ചിൽ തുടരുകയാണ്. ആക്രമണത്തിൽ യുവതിയുടെ സഹോദരനും പരിക്കേറ്റിരുന്നു. ഇരുവരും സ്വകാര്യ ആശുപത്രിയിൽ ചികിത്സയിലാണ്.

രാജസ്ഥാനിലെ കോട്പുത്‌ലി-ബെഹ്‌റോർ ജില്ലയിൽ ശനിയാഴ്ചയായിരുന്നു സംഭവം. പെൺകുട്ടിയും സഹോദരനും സ്കൂട്ടറിൽ വീട്ടിലേക്ക് പോകുന്നതിനിടെ പ്രതികളായ മഹിപാൽ ​ഗുജ്റാൽ, രാഹുൽ ​ഗുജ്റാൽ മുഖ്യപ്രതി രാജേന്ദ്ര യാദവ് എന്നിവർ ആക്രമിക്കുകയായിരുന്നു. യാദവ് യുവതിയെ പിറകിൽ നിന്നും വെടിവെക്കുകയും മറ്റ് രണ്ട് പേർ ഇരുവരെയും മൂർച്ഛയേറിയ ആയുധം ഉപയോ​ഗിച്ച് കുത്തി പരിക്കേൽപ്പിക്കുകയുമായിരുന്നു. യുവതിയുടെ തലയിലും കൈകളിലും തോളിലും ​ഗുരുതരമായി പരിക്കേറ്റതായാണ് റിപ്പോർട്ട്.

സംഭവത്തിൽ പെൺകുട്ടിയുടെ കുടുംബം നൽകിയ പരാതിയുടെ അടിസ്ഥാനത്തിൽ പ്രതികൾക്കെതിരെ കേസെടുത്തിട്ടുണ്ട്.

കഴിഞ്ഞ വർഷം ജനുവരി 16നായിരുന്നു യാദവ് യുവതിയെ ലൈം​ഗിമായി പീഡിപ്പിക്കുന്നത്. ഇതിന് പിന്നാലെ ഇയാളെ ജോലിയിൽ നിന്ന് പിരിച്ചുവിടുകയും പ്രതിയെ പൊലീസ് അറസ്റ്റ് ചെയ്യുകയും ചെയ്തിരുന്നു. അടുത്തിടെ ജാമ്യത്തിലിറങ്ങിയ പ്രതി യുവതിയെ കേസ് പിൻവലിക്കണമെന്നാവശ്യപ്പെട്ട് നിരന്തരം ഭീഷണപ്പെടുത്തിയിരുന്നു. ഇത് നിരസിച്ചതോടെയാണ് യുവതിയെ കൊലപ്പെടുത്താനുള്ള ശ്രമം.