ശസ്ത്രക്രിയക്കായി കര്‍ഷകന്‍ സൂക്ഷിച്ചുവെച്ച രണ്ട് ലക്ഷം രൂപ എലികള്‍ കരണ്ടു

ഹൈദരാബാദ്​: വയറ്റിലെ മുഴ നീക്കം ചെയ്യാനുള്ള ശസ്ത്രക്രിയക്കായി പച്ചക്കറി കര്‍ഷകന്‍ സ്വരൂപിച്ച രണ്ട് ലക്ഷം രൂപ എലികള്‍ കരണ്ടുതിന്നു. തെലങ്കാനയിലെ മെഹബൂബബാദ്​ ജില്ലയിലെ വെമുനൂർ ഗ്രാമത്തിലെ പച്ചക്കറി കർഷനായ റെഡ്യ നായിക്കിന്‍റെ പണമാണ്​ എലികൾ നശിപ്പിച്ചത്​. പച്ചക്കറി കൃഷി ചെയ്​തു വിറ്റും ഉപജീവനം നടത്തുന്ന റെഡ്യ പച്ചക്കറി വിൽപനയിലൂടെ സമ്പാദിച്ച പണവും ചികിത്സക്കായി നാട്ടുകാരും ബന്ധുക്കളും നല്‍കിയ പണവുമാണിത്​. ​ 500ന്‍റെ നോട്ടുകെട്ടുകളാക്കി പ്ലാസ്റ്റിക് കവറിലാക്കി അലമരയിൽ സൂക്ഷിച്ച് വെച്ചിരിക്കുകയായിരുന്നു. കീറിയ നോട്ടുകളുമായി എന്ത് ചെയ്യണമെന്നറിയാതെ നില്‍ക്കുന്ന റെഡ്യയെ എങ്ങിനെ ആശ്വസിപ്പിക്കണമെന്നറിയാതെ വിഷമിക്കുകയാണ്​ കുടുംബാംഗങ്ങൾ.

'ഇരുചക്രവാഹനത്തിൽ പച്ചക്കറി വിറ്റാണ്​ ഞാനും കുടുംബവും കഴിയുന്നത്​. അങ്ങിനെ സമ്പാദിച്ച പണവും ബന്ധുക്കളും നാട്ടുകാരിൽ ചിലരും കടം തന്ന പണവുമായിരുന്നു അത്​. ഒരു പ്ലാസ്റ്റിക്​ കവറിലാക്കി തുണിസഞ്ചിയിൽ സൂക്ഷിച്ചിരിക്കുകയായിരുന്നു. കഴിഞ്ഞ ദിവസം സഞ്ചി തുറന്ന്​ പരിശോധിച്ചപ്പോളാണ്​ എലികൾ നോട്ടുകൾ നശിപ്പിച്ചതായി കണ്ടെത്തിയത്​' -റെഡ്യ പറയുന്നു. നോട്ടുകൾ മാറ്റിനൽകുന്നതുമായി ബന്ധ​പ്പെട്ട്​ പ്രദേശത്തെ ബാങ്കുകളെ സമീപിച്ചെങ്കിലും ഫലമുണ്ടായില്ലെന്നും റെഡ്യ പറഞ്ഞു.

മെഹബൂബബാദിലെ രണ്ടുമൂന്ന്​ ബാങ്കുകളെ ഞാൻ സമീപിച്ചിരുന്നു. പക്ഷേ, നശിപ്പിക്ക​പ്പെട്ട നോട്ടുകൾക്ക്​ പകരം പുതിയവ നൽകാനാകില്ലെന്നാണ്​ ബാങ്ക്​ ഉദ്യോഗസ്​ഥർ പറഞ്ഞത്​. നോട്ടിന്‍റെ നമ്പറുകളും മറ്റും നശിച്ചുപോയതാണ്​ അവർ ഇതിന്​ കാരണമായി ചൂണ്ടിക്കാട്ടിയത്​. റിസര്‍വ് ബാങ്കിനെ നേരിട്ട് സമീപിക്കാനാണ് ബാങ്കിങ് രംഗത്തുള്ളവര്‍ പറയുന്നത്​' -റെഡ്യ പറഞ്ഞു.

ഇന്ദിരാനഗറിൽ താമസിക്കുന്ന റെഡ്യ കഠിനമായ വയറുവേദനയെ തുടർന്ന്​ നടത്തിയ പരിശോധനയിലാണ്​ വയറ്റിൽ മുഴ ഉണ്ടെന്ന്​ കണ്ടെത്തിയത്​. ഇത്​ നീക്കം ​ചെയ്യാനുള്ള ശസ്ത്രക്രിയക്ക് നാല് ലക്ഷത്തോളം രൂപ ചെലവാകുമെന്നാണ് ആശുപത്രി അധികൃതര്‍ പറയുന്നത്.