മോദിക്കെതിരായ പരാമർ​ശം: പാർട്ടി തരുന്ന ശിക്ഷ ഏറ്റുവാങ്ങാൻ തയ്യാർ-​ മണിശങ്കർ അയ്യർ

ന്യൂഡൽഹി: പ്രധാനമന്ത്രി മോദിക്കെതിരെ താൻ നടത്തിയ പ്രസ്​താവന ഗുജറാത്ത്​ തെരഞ്ഞെടുപ്പിൽ കോൺഗ്രസിന്​ ദോഷം ചെയ്യുമെങ്കിൽ പാർട്ടി തരുന്ന ശിക്ഷ ഏറ്റുവാങ്ങാൻ തയാറാണെന്ന്​ ​മുതിർന്ന നേതാവ്​ മണിശങ്കർ അയ്യർ.  രാഹുൽ ഗാന്ധിയുടെ നേതൃത്വത്തിൽ ഗുജറാത്തിൽ മികച്ച പ്രവർത്തനമാണ്​ കോൺഗ്രസ്​ നടത്തുന്നതെന്നും അദ്ദേഹം പറഞ്ഞു. കോൺഗ്രസാണ്​ തനിക്ക്​ എല്ലാം. അതുകൊണ്ടാണ്​ ​പ്രസ്​താവന സംബന്ധിച്ച്​ മാപ്പ്​ ചോദിച്ചതെന്നും മണിശങ്കർ അയ്യർ വ്യക്​തമാക്കി. 

നേരത്തെ മോദിക്കെതിരായ പരാമർശത്തി​​െൻറ പേരിൽ മണിശങ്കർ അയ്യരെ ​കോൺഗ്രസ്​ പ്രാഥമിക അംഗത്വത്തിൽ നിന്ന്​ സസ്​പെൻഡ്​ ചെയ്​തിരുന്നു. പരാമർശം സംബന്ധിച്ച്​ അദ്ദേഹത്തോട്​ വിശദീകരണവും തേടിയിരുന്നു. ഇതിന്​ പിന്നാലെയാണ്​ പാർട്ടി നടപടി സംബന്ധിച്ച്​ അയ്യരുടെ പ്രതികരണമുണ്ടായിരിക്കുന്നത്​.

മോദി തരംതാഴ്​ന്ന, സംസ്​കാരമില്ലാത്ത വ്യക്തിയാണ്​. ഇൗ സമയത്ത്​ എന്തിനാണ്​ അദ്ദേഹം വിലകുറഞ്ഞ രാഷ്​ട്രീയം കളിക്കുന്നതെന്നായിരുന്നു മണിശങ്കർ അയ്യരുടെ പ്രസ്​താവന. എന്നാൽ, പ്രസ്​താവനക്കിടെ മോദിയെ നീച്​ എന്ന്​ വി​ശേഷിപ്പിച്ചതാണ്​ വിവാദമായത്​.