'ആറുമാസം മുമ്പ്​ കാർഷിക പരിഷ്​കാരങ്ങൾ ആരംഭിച്ചു, അതിന്‍റെ ഗുണങ്ങൾ കർഷകർക്ക്​ ലഭിക്കുന്നുണ്ട്​' -മോദി

ന്യൂഡൽഹി: കേന്ദ്രസർക്കാറിന്‍റെ കാർഷിക നിയമങ്ങളിലെ പരിഷ്​കരണം ആറുമാസം മുമ്പ് മുതൽ​ നടപ്പാക്കി തുടങ്ങിയതായും അതിന്‍റെ ഫലം കർഷകർക്ക്​ ഇ​േപ്പാൾ ലഭ്യമായി തുടങ്ങിയെന്നും പ്രധാനമന്ത്രി നരേന്ദ്രമോദി. കർഷക പ്രക്ഷോഭം 24ാം ദിവസത്തിലേക്ക്​ കടന്നതോടെയാണ്​ മോദിയുടെ പ്രതികരണം.

ആറുവർഷത്തി​നിടെ ലോകത്തിലെ പ്രധാന നിക്ഷേപ മേഖലയായി ഇന്ത്യ മാറിയെന്നും ബിസിനസ്​ പരിപാടിയിൽ സംസാരിക്കവേ മോദി പറഞ്ഞു. കോവിഡ്​ 19ന്‍റെ പ്രതിസന്ധി ഘട്ടത്തിലും റെക്കോഡ്​ വിദേശ നിക്ഷേപം ഇന്ത്യയിലേക്ക്​ എത്തിയതായും ഇത്​ ലോകരാജ്യങ്ങൾ ഇന്ത്യയെ വിശ്വസിക്കുന്നതിന്‍റെ ഫലമാ​െണന്നും മോദി കൂട്ടിച്ചേർത്തു.

കാർഷിക നിയമ പരിഷ്​കാരങ്ങൾ ആറുമാസം മുമ്പ്​ മുതൽ നടപ്പാക്കി തുടങ്ങി. അതിന്‍റെ ഗുണം ഇപ്പോൾ കർഷകർ അനുഭവിക്കുന്നുണ്ട്​. ദിവസങ്ങളായി നടക്കുന്ന കർഷക പ്രക്ഷോഭത്തെക്കുറിച്ച്​ പരാമർശിക്കാതെയായിരുന്നു മോദിയുടെ പ്രതികരണം.

നേരത്തേ, കർഷകരുടെ ആശങ്കകൾ പരിഹരിക്കുന്നതിനായി എന്തുചർച്ചക്കും തയാറാണെന്ന്​ മോദി അറിയിച്ചിരുന്നു. കാർഷിക നിയമങ്ങൾ പിൻവലിക്കില്ലെന്ന സൂചനയാണ്​ ഇതിലൂടെ മോദി നൽകിയത്​. എന്നാൽ മൂന്ന്​ വിവാദ കാർഷിക നിയമങ്ങൾ പിൻവലിക്കുന്നതുവരെ സമരം തുടരുമെന്നാണ്​ കർഷകരുടെ പ്രതികരണം.