ശാരീരിക ബന്ധത്തിലേർപ്പെട്ടതിന്​ ശേഷം വിവാഹത്തിന്​ വിസമ്മതിക്കുന്നത്​ വഞ്ചന​യല്ലെന്ന്​ ഹൈകോടതി

മുംബൈ: പരസ്പര സമ്മതത്തോടെ ദീർഘകാല ശാരീരിക ബന്ധത്തിലേർപ്പെട്ടതിന്​ ശേഷം വിവാഹത്തിന്​ വിസമ്മതിക്കുന്നത്​ വഞ്ചനയല്ലെന്ന്​ ബോംബെ ഹൈകോടതി. കീഴ്​കോടതി വിധിക്കെതിരായ അപ്പീൽ ഹരജിയിലാണ്​ കോടതി പരാമർശം. ഇതുമായി ബന്ധപ്പെട്ട കേസിൽ യുവാവിനെ കുറ്റക്കാരനാക്കിയ കീഴ്​കോടതി വിധി ഹൈകോടതി റദ്ദാക്കി.

പാൽഘറിലെ കാശിനാഥ്​ ഗാരട്ട്​ എന്നയാൾക്കെതിരെയാണ് കീഴ്​​കോടതി ഉത്തരവ്​ പുറപ്പെടുവിച്ചത്​. പെൺകുട്ടിയുമായി ശാരീരിക ബന്ധത്തിലേർപ്പെട്ടതിന്​ ശേഷം വിവാഹത്തിന്​ വിസമ്മതിച്ചുവെന്നതായിരുന്നു ഇയാൾക്കെതിരായ കുറ്റം. ബലാത്സംഗം, വഞ്ചന തുടങ്ങിയ വകുപ്പുകൾ ചുമത്തിയായിരുന്നു കേസെടുത്തത്​. എന്നാൽ, അഡീഷണൽ സെഷൻ ജഡ്​ജി വഞ്ചനകേസിൽ ഇയാളെ ശിക്ഷിച്ചു. ബലാത്സംഗകേസിൽ വെറുതെ വിടുകയും ചെയ്തു.

ഇതിനെതിരെ കാശിനാഥ്​ ബോംബെ ഹൈകോടതിയിൽ അപ്പീൽ നൽകി. ജസ്റ്റിസ്​ അഞ്ജു പ്രഭുദേശായിയാണ്​ അപ്പീൽ ഹരജി പരിഗണിച്ചത്​. താൻ വഞ്ചിതയായെന്ന്​ തെളിയിക്കാൻ പെൺകുട്ടിക്ക്​ കഴിഞ്ഞില്ലെന്നും ശാരീരിക ബന്ധം പരസ്പര സമ്മതത്തോട്​ കൂടിയായിരുന്നുവെന്നും കോടതി നിരീക്ഷിച്ചു.

വ്യാജ വിവരങ്ങൾ നൽകിയോ വഞ്ചനയിലൂടേയോ അല്ല പെൺകുട്ടിയുമായി യുവാവ്​ ശാരീരിക ബന്ധത്തിലേർപ്പെട്ടത്​. ദീർഘകാലത്തെ ബന്ധത്തിന്​ ശേഷം വിവാഹം കഴിക്കാൻ വിസമ്മതിക്കുന്നത്​ വഞ്ചനയായി കണക്കാക്കാനാകില്ലെന്നും കോടതി വ്യക്​തമാക്കി.