മന്നത്തിൽ ആശ്വാസം; അഭിഭാഷക സംഘത്തിനൊപ്പം സന്തോഷം പങ്കുവച്ച്​ ഷാരൂഖ്​

മുംബൈ: മയക്കുമരുന്ന്​ കേസിൽ മകൻ ആര്യന്​ ജാമ്യം ലഭിച്ചതി​െൻറ സന്തോഷം പങ്കുവച്ച്​ ഷാരൂഖ്​ ഖാൻ. ആര്യൻ ജയിലിലായ ശേഷം പൊതുവേദികളിൽ എത്താത്ത ഷാരൂഖ്,​ വ്യാഴാഴ്​ച ത​െൻറ അഭിഭാഷക സംഘത്തിനൊപ്പം സന്തോഷം പങ്കുവയ്​ക്കുന്ന ചിത്രങ്ങൾ പുറത്തുവന്നു. മുംബൈ, ബാന്ദ്രയിലെ ഷാരൂഖി​െൻറ വസതിയായ മന്നത്തിലായിരുന്നു ഇവരുടെ ഒത്തുചേരൽ. ഷാരൂഖി​െൻറ മാനേജർ പൂജ ദദ്​ലാനിയും ഷാരൂഖിനൊപ്പം ഉണ്ടായിരുന്നു. ബോംബെ ഹൈകോടതിയാണ്​ ആര്യന്​ ജാമ്യം അനുവദിച്ചത്​. കേസിലെ മറ്റ്​ പ്രതികളായ അർബാസ്​ മർച്ചന്‍റ്​, മുൻമുൺ ധമേച്ച എന്നിവർക്കും കോടതി ജാമ്യം അനുവദിച്ചിട്ടുണ്ട്​. 21 ദിവസത്തെ ജയിൽവാസത്തിന്​ ശേഷമാണ്​ ആര്യൻ ഖാൻ പുറത്തിറങ്ങുന്നത്​. ഇതുമായി ബന്ധപ്പെട്ട്​ വിശദമായ ഉത്തരവ്​ നാളെ ഉണ്ടാകും.

2012 മുതൽ ഷാരൂഖ് ഖാന്റെ മാനേജരാണ് പൂജ ദദ്‌ലാനി. നടന്റെ കുടുംബവുമായി വളരെ അടുപ്പമുള്ള അവർ, കേസിൽ ആര്യന്​ ജാമ്യം നിഷേധിച്ചപ്പോൾ പൊട്ടിക്കരഞ്ഞത്​ മാധ്യമങ്ങളിൽ വാർത്തയായിരുന്നു. ആര്യ​​െൻറ അഭിഭാഷക സംഘം ജാമ്യം കിട്ടിയതിനുപിന്നാലെ ഒരു പ്രസ്​താവന പുറത്തിറക്കിയിരുന്നു. 'ആര്യൻ ഖാനെ ഒടുവിൽ ഹൈക്കോടതി ജാമ്യത്തിൽ വിട്ടയച്ചു. 2021 ഒക്‌ടോബർ 2-ന് കസ്റ്റഡിയിലെടുത്ത ആദ്യ നിമിഷം മുതൽ ഞങ്ങൾ ഉയർത്തിയ, ആര്യൻ മയക്കുമരുന്ന്​ കൈവശം വെച്ചിട്ടില്ല, തെളിവില്ല, ഉപഭോഗമില്ല, ഗൂഢാലോചനയില്ല എന്ന ഞങ്ങളുടെ വാദം കോടതി അംഗീകരിച്ചതിൽ സന്തോഷമുണ്ട്​'-പ്രസ്​താവന പറയുന്നു.

നാർക്കോട്ടിക്​സ്​ കൺട്രോൾ ബ്യൂറോ തന്‍റെ വാട്​സ്​ആപ്​ ചാറ്റുകൾ തെറ്റായി വ്യാഖ്യാനിക്കുകയാണെന്ന്​ ആര്യൻ ഖാൻ ജാമ്യാപേക്ഷയിൽ കോടതിയെ അറിയിച്ചിരുന്നു. തനിക്കെതിരെ യാതൊരു തെളിവുകളുമില്ലെന്നും ആര്യൻ കോടതിയിൽ വാദിച്ചത്​.

ആര്യൻ ഖാന്‍റെ ജുഡീഷ്യൽ കസ്റ്റഡി ഒക്​ടോബർ 30വരെ പ്രത്യേക കോടതി നീട്ടിയതോടെയാണ്​ ബോംബെ ഹൈകോടതിയെ സമീപിച്ചത്​. ആര്യൻ ഖാൻ സ്​ഥിരമായി മയക്കുമരുന്ന്​ ഉപയോഗിക്കു​ന്നുവെന്നും മയക്കുമരുന്ന്​ വിതരണക്കാരുമായി ബന്ധം പുലർത്തുന്നുവെന്നും ചൂണ്ടിക്കാട്ടിയാണ് പ്രത്യേക കോടതി​ ആര്യന്​ ജാമ്യം നിഷേധിച്ചത്​.ആര്യന്‍റെ സുഹൃത്തായ ബോളിവുഡ്​ താരം അനന്യ പാണ്ഡെയെ കഴിഞ്ഞദിവസങ്ങളിൽ എൻ.സി.ബി ചോദ്യം ചെയ്​തിരുന്നു.

ആര്യൻ ഖാന്‍റെ ഫോണിലെ രണ്ടുവർഷം പഴക്കമുള്ള വാട്​സ്​ആപ്​ ചാറ്റിന്‍റെ അടിസ്​ഥാനത്തിലാണ്​ 22കാരിയായ അനന്യയെ എൻ.സി.ബി ചോദ്യം ചെയ്​തത്​. തിങ്കളാഴ്ചയും ചോദ്യം ചെയ്യാനായി അനന്യയെ വിളിപ്പിച്ചെങ്കിലും ഇവർ എത്തിയില്ല. ആരോപണങ്ങൾ അടിസ്​ഥാന രഹിതാമാ​െണന്നായിരുന്നു അനന്യയുടെ പ്രതികരണം. ആഡംബര കപ്പലിലെ മയക്കുമരുന്ന്​ കേസുമായി ബന്ധപ്പെട്ട്​ ഒക്​ടോബർ മൂന്നിനാണ്​ ബോളിവുഡ്​ താരം ഷാരൂഖ്​ ഖാന്‍റെ മകൻ ആര്യൻ ഖാനെ അറസ്റ്റ്​ ചെയ്​തത്​. ആര്യന്‍റെ സുഹൃത്തുക്കളായ അർബാസ് മർചന്‍റ്, മുൺമുൺ ധമേച്ച എന്നിവരും പിടിയിലായിരുന്നു.