'കർണാടകയിലെ മതപരമായ വിഭജനം ഐ.ടി നേതൃത്വത്തെ തകർക്കും'; മുഖ്യമന്ത്രിക്ക് കിരൺ മജുംദാർ ഷായുടെ മുന്നറിയിപ്പ്

ബംഗളൂരു: കർണാടകയിൽ നടന്നുകൊണ്ടിരിക്കുന്ന മതപരമായ വിഭജനത്തിൽ ആശങ്കയറിയിച്ച് ബയോകോൺ ലിമിറ്റഡിന്റെ എക്സിക്യൂട്ടീവ് ചെയർപേഴ്സൺ കിരൺ മജുംദാർ ഷാ. ഈ വർഗീയ വിഭജനം ഇന്ത്യയുടെ സാങ്കേതിക തലസ്ഥാനത്തെ സാരമായി ബാധിക്കുമെന്നും ടെക്, ബയോടെക് മേഖലകളിലെ രാജ്യത്തിന്റെ "ആഗോള നേതൃത്വത്തെ" വരെ അപകടത്തിലാക്കാന്‍ സാധ്യതയുണ്ടെന്നും അവർ മുന്നറിയിപ്പ് നൽകി.

'സംസ്ഥാനത്ത് വർധിക്കുന്ന മതപരമായ ഭിന്നത പരിഹരിക്കാനുള്ള നടപടികൾ എത്രയും പെട്ടെന്ന് സ്വീകരിക്കണം' - ബുധനാഴ്ച കർണാടക മുഖ്യമന്ത്രി ബസവരാജ് ബൊമ്മെയെ ടാഗ് ചെയ്ത് കിരൺ മജുംദാർ ട്വീറ്റ് ചെയ്തു. കർണാടക മുഖ്യമന്ത്രി വളരെ പുരോഗമനവാദിയായ നേതാവാണെന്നും അദ്ദേഹം ഉടൻ തന്നെ ഈ പ്രശ്നങ്ങൾ പരിഹരിക്കുമെന്ന് തനിക്ക് ഉറപ്പുണ്ടെന്നും അവർ തുടർന്നുള്ള ട്വീറ്റിൽ കൂട്ടിച്ചേർത്തു.

വി.എച്ച്.പി , ബജ്റംഗ്ദൾ തുടങ്ങിയ തീവ്ര ഹിന്ദു ഗ്രൂപ്പുകളുടെ സമ്മർദ്ദത്തിൽ ദക്ഷിണ കന്നഡയിലെയും ശിവമോഗയിലെയും ക്ഷേത്രോത്സവങ്ങളിൽ നിന്ന് മുസ്ലീം വ്യാപാരികൾക്ക് കഴിഞ്ഞ ആഴ്ച വിലക്കേർപ്പെടുത്തിയിരുന്നു. ഈ തീരുമാനത്തിന് നി‍യമസാധുതയുണ്ടെന്നാണ് സംസ്ഥാന നിയമസഭയിൽ നടത്തിയ ഔദ്യോഗിക പ്രസ്താവനയിൽ കർണാടക സർക്കാർ പറഞ്ഞത്.