തമിഴ്​ സാഹിത്യകാരൻ കെ. രാജനാരായൻ അന്തരിച്ചു

പുതുച്ചേരി: പ്രശസ്​ത തമിഴ്​ എഴുത്തുകാരനും സാഹിത്യ അക്കാദമി അവാർഡ്​ ജേതാവുമായ കെ. രാജനാരായൻ എന്ന 'കി രാ' അന്തരിച്ചു. 98 വയസായിരുന്നു. വാർധക്യ സംബന്ധമായ ആരോഗ്യപ്രശ്​നങ്ങളെ തുടർന്ന്​ തിങ്കളാഴ്ച രാത്രിയായിരുന്നു അന്ത്യം.

1980ൽ പോണ്ടിച്ചേരി യൂനിവേഴ്​സിറ്റിയിൽ ഫോക്​ലോർ വിഭാഗത്തിലെ പ്രഫസറായിരുന്നു രാജനാരായണൻ. ചെറുകഥകൾ, നോവലുകൾ, ​നാടോടികഥകൾ, ലേഖനങ്ങൾ തുടങ്ങിയവയാണ്​ തമിഴ്​ സാഹിത്യലോകത്തിന്​ അദ്ദേഹത്തിന്‍റെ സംഭാവന. ഗോപാലപുരത്ത്​ മക്കൾ എന്ന നോവലിലൂടെ​ 1991ൽ സാഹിത്യ അക്കാദമി അവാർഡ്​ ലഭിച്ചു.

തമിഴ്​നാട്​ മുഖ്യമന്ത്രി എം.കെ. സ്റ്റാലിൻ കി രായുടെ മരണത്തിൽ ദുഃഖം രേഖപ്പെടുത്തി. ലെഫ്​. ഗവർണർ തമിലിസയ്​ സൗന്ദരരാജൻ ചൊവ്വാഴ്ച അദ്ദേഹത്തിന്‍റെ വസതിയിലെത്തി ആദരാജ്ഞലികൾ അർപ്പിച്ചു. കി രാ താമസിച്ചിരുന്ന വസതി ലൈബ്രറിയാക്കണമെന്ന്​ തമിഴ്​ എഴുത്തുകാർ അഭ്യർഥിച്ചതായി ഗവർണർ മാധ്യമ​ങ്ങളോട്​ പറഞ്ഞു. അഭ്യർഥന പരിഗണിക്കാമെന്ന്​ അറിയിക്കുകയും ​ചെയ്​തു.