തിരക്കേറിയ മാളുകളിൽ ലൈംഗികാതിക്രമം പതിവാക്കിയ റിട്ട. പ്രധാനാധ്യാപകൻ പിടിയിൽ

ബംഗളൂരു: തിരക്കേറിയ മാളുകളിൽ യുവതികൾക്ക് നേരെ ലൈംഗികാതിക്രമം പതിവാക്കിയ റിട്ട. പ്രധാനാധ്യാപകൻ പിടിയിൽ. ബസവേശ്വര നഗറിലെ അശ്വത് നാരായണ (60) ആണ് അറസ്റ്റിലായത്. സി.സി.ടി.വി കാമറയിൽ പതിഞ്ഞ ഇയാളുടെ ചെയ്തികൾ സമൂഹമാധ്യമങ്ങളിൽ പ്രചരിച്ചതോടെ പൊലീസിൽ കീഴടങ്ങുകയായിരുന്നു.

ബംഗളൂരുവിലെ മാളിൽ വെച്ചുള്ള ഇയാളുടെ അതിക്രമ ദൃശ്യങ്ങൾ പ്രചരിച്ചതോടെയാണ് അധികൃതർ അന്വേഷണം തുടങ്ങിയത്. ഇയാൾ പലയിടത്തും ഈ പ്രവൃത്തി ആവർത്തിച്ചതായി കണ്ടെത്തുകയായിരുന്നു. മാൾ മാനേജരുടെ പരാതിയിൽ പൊലീസ് കേസെടുത്ത് അന്വേഷണം നടത്തുന്നതിനിടെയാണ് പ്രതി കീഴടങ്ങിയത്.