അദ്വാനിയുടെ അറസ്​റ്റിന്​ ഉത്തരവിട്ട ആർ.കെ. സിങ് കേന്ദ്രമന്ത്രിസഭയിൽ

ന്യൂഡൽഹി: മുതിർന്ന ബി.ജെ.പി നേതാവ്​ എൽ.കെ. അദ്വാനിയുടെ രഥയാത്ര തടഞ്ഞ്​ അദ്ദേഹത്തെ അറസ്​റ്റു ചെയ്യാൻ ഉത്തരവിട്ട ഉദ്യോഗസ്​ഥൻ മോദി മന്ത്രിസഭയിൽ ഉൗർജമന്ത്രിയായി. ബിഹാറിൽ നിന്നുള്ള ബി.ജെ.പി എം.പിയും മുൻ ആഭ്യന്തര സെക്രട്ടറിയുമായ ആർ.കെ. സിങ്ങിനെക്കുറിച്ച്​ വേറിട്ട മറ്റൊരു കഥകൂടിയുണ്ട്​. സംഘ്​പരിവാർ സംഘങ്ങളുടെ ഭീകരതയെക്കുറിച്ച്​ യു.പി.എ സർക്കാറി​​െൻറ കാലത്ത്​ വിവരങ്ങൾ നൽകിയ ആഭ്യന്തര സെക്രട്ടറിയായിരുന്നു ആർ.കെ. സിങ്​. 

അയോധ്യ പ്രക്ഷോഭത്തി​​െൻറ ഭാഗമായി അദ്വാനി രഥയാത്ര നയിച്ച്​ ബിഹാറിലെത്തിയപ്പോൾ സമസ്​തിപ്പുർ ജില്ല മജിസ്​ട്രേറ്റായിരുന്നു ​ആർ.കെ. സിങ്​. 1990 ഒക്​ടോബർ 30നാണ്​ അദ്വാനിയെ അറസ്​റ്റു ചെയ്യാൻ അദ്ദേഹം ഉത്തരവിട്ടത്​. മുഖ്യമന്ത്രി ലാലുപ്രസാദി​​െൻറ നിർദേശപ്രകാരമായിരുന്നു അത്​. 

1975 ബാച്ച്​ ​െഎ.എ.എസുകാരനായ ആർ.കെ. സിങ്​ 2011 മുതൽ 2013 വരെ ആഭ്യന്തര സെക്രട്ടറിയായിരുന്നു. സംഝോത എക്​സ്​പ്രസ്​ സ്​ഫോടനക്കേസിൽ അസീമാനന്ദ അടക്കമുള്ളവരുടെ പേര്​ എടുത്തുപറഞ്ഞ്​ ഹിന്ദുത്വ ഭീകരതയെക്കുറിച്ച വിവരം പങ്കുവെച്ചും ആർ.കെ. സിങ്​ ശ്രദ്ധേയനായി. ആർ.എസ്​.എസുമായി അടുത്ത ബന്ധമുള്ള 10 പേർക്ക്​ ഇന്ത്യയിലെ വിവിധ ഭീകര ചെയ്​തികളിൽ ബന്ധമുണ്ടെന്ന്​ ആഭ്യന്തര സെക്രട്ടറിയായിരുന്ന അദ്ദേഹം വെളിപ്പെടുത്തി. 2013ലാണ്​ ബി.ജെ.പിയിൽ ചേർന്നത്​. ലോക്​സഭ തെരഞ്ഞെടുപ്പിൽ ബിഹാറിലെ അര മണ്ഡലത്തിൽനിന്ന്​ ലോക്​സഭയിൽ എത്തി.