രോഹിണി കോടതി സ്​ഫോടനം; ഡി.ആർ.ഡി.ഒ ശാസ്​ത്രജ്ഞൻ അറസ്​റ്റിൽ

ന്യൂഡൽഹി: അയൽക്കാരനായ അഭിഭാഷകനെ വധിക്കാൻ ലക്ഷ്യമിട്ട്​ ഡൽഹിയിലെ രോഹിണി ജില്ല കോടതിയിൽ നാടൻബോംബ്​ വെച്ച കേസിൽ പ്രതിരോധ ഗവേഷണ വികസന സംഘടനയിലെ (ഡി.ആർ.ഡി.ഒ) മുതിർന്ന ശാസ്​ത്രജ്ഞൻ അറസ്​റ്റിൽ. 49കാരനായ ഭരത്​ ഭൂഷൺ കട്ടാരിയയാണ്​ അറസ്​റ്റിലായത്​. ഈ മാസം ഒമ്പതിന്​ ​​​രോഹിണി 102ാം നമ്പർ കോടതി മുറിയിലുണ്ടായ ചെറിയ സ്​ഫോടനത്തിൽ ഡ്യൂട്ടിയിലുണ്ടായിരുന്ന പൊലീസ്​ ഉദ്യോഗസ്ഥൻ രാജീവ്​ കുമാറിന്​ ​​പരിക്കേറ്റിരുന്നു.

നാടൻ ബോംബുണ്ടാക്കി ചോറ്റുപാത്രത്തിനകത്തുവെച്ചാണ്​ സ്​ഫോടനം നടത്തിയത്​. സംഭവം നടന്ന ദിവസം രാവിലെ 9.33നു​ രണ്ട്​ ബാഗുമായി കോടതി മുറിയിലെത്തിയ കട്ടാരിയ ഒരു ബാഗ്​ കോടതി മുറിയിൽവെച്ചശേഷം 10.35നു​ മടങ്ങിപ്പോയതായി കണ്ടെത്തിയെന്ന്​ ഡൽഹി പൊലീസ്​ കമീഷണർ രാകേഷ്​ അസ്​താന പറഞ്ഞു. തുടർന്ന്​ റിമോട്ട് കൺട്രോൾ ഉപയോഗിച്ച്​ പൊട്ടിക്കുകയായിരുന്നു.

എന്നാൽ, നിർമാണത്തിലുണ്ടായ പിഴവുമൂലം പൂർണ സ്​ഫോടനം നടന്നില്ല. ഫോറൻസിക്​ വിഭാഗവും ദേശീയ സുരക്ഷാ ഗാർഡും ​േചർന്നാണ്​ അന്വേഷണം നടത്തിയത്​. അയൽവാസിയായ അഭിഭാഷകനോടുള്ള വ്യക്തിവൈര്യാഗമാണ് സ്​​ഫോടനത്തിന്​ പ്രതിയെ പ്രേരിപ്പിച്ചതെന്ന്​ പൊലീസ്​ പറഞ്ഞു. ഒരേ കെട്ടിടത്തിൽ ഒന്നാം നിലയിൽ താമസിക്കുന്ന കട്ടാരിയയും മൂന്നാം നിലയിൽ താമസിക്കുന്ന അഭിഭാഷകനും തമ്മിൽ ഏറെ നാളായി തർക്കമുണ്ട്​. കട്ടാരിയ അഞ്ച്​ സിവിൽ കേസുകൾ അഭിഭാഷകനെതിരെ നൽകിയിരുന്നു. അഭിഭാഷകൻ കട്ടാരിയക്കെതിരെ ഏഴ്​ കേസും. സംഭവ ദിവസം കോടതി വളപ്പിലെത്തിയ ആയിരത്തോളം കാറുകളുടെ സി.സി ടി.വി ദൃശ്യങ്ങളും പൊലീസ്​ പരിശോധിച്ചിരുന്നു