പിണങ്ങിപ്പോയ ഭാര്യയെ പാട്ടുപാടി തിരിച്ചുപിടിച്ച് യുവാവ്

മുംബൈ: ഇനി ഭർത്താവിനൊപ്പം കഴിയാനാകില്ലെന്ന ശാഠ്യത്തിൽ യുവതി. അവളെ അനുനയിപ്പിച്ച് ജീവിതത്തിലേക്ക് തിരിച്ചുകൊണ്ടുവരാൻ ആവത് ശ്രമിച്ച് ഭർത്താവ്. ഭാര്യ ഒരു വിധത്തിലും അടുക്കുന്നില്ല. അതാ കേൾക്കുന്നു ഈണത്തിലുള്ള മൂളൽ. പിന്നെ ‘ദെഹ്​ലീസ്​ പെ മെരെ ദിൽകി ...’ എല്ലാവരും കൗതുകത്തോടെ ഉറ്റുനോക്കെ അയാൾ പാടുകയാണ്. അവളുടെ കണ്ണുകൾ നിറയുന്നു. തല പതുക്കെ താണു. പാട്ട് അവസാന വരികളിലേക്ക് ‘ ന സീക്കാ കഭി ജീനാ ജീനാ കൈസെ ജീനാ, ന സീക്കാ ജീനാ തെരെ ബിനാ ഹംദം..’ അവൾ ഭർത്താവി​െൻറ നെഞ്ചിലേക്ക്. ഇതൊരു സിനിമാ കഥയല്ല. നടന്ന ജീവിതകഥയാണ്. അങ്ങ് ഉത്തർ പ്രദേശിലെ ജാൻസിയിൽ. 

ഭർത്താവുമായി പിണങ്ങി അമ്മാവ​െൻറ വീട്ടിലേക്ക് പോകുകയായിരുന്നു യുവതി. അവിടെ ചെന്ന് ഭാര്യയെ അനുനയിപ്പിക്കാൻ കഴിയുന്നതും ഭർത്താവ് ശ്രമിച്ചുനോക്കി. ഒടുവിൽ ഭർത്താവിന് എതിരെ പരാതിയുമായി പൊലിസിനെ സമീപിച്ചു. കേസെടുക്കും മുമ്പ് കൗൺസിലിങ്ങിനായി ഇരുവരെയും ജാൻസി പൊലിസ്​ സൂപ്രണ്ട് കാര്യാലയത്തിലെ ‘പരിവാർ പരാമർശ് കേന്ദ്ര’ യിലേക്ക് വിളിപ്പിക്കുകയായിരുന്നു. അവിടെവെച്ചും യുവതി വിട്ടുവീഴ്ചക്ക് തയ്യാറാകാത്തെ ഉറച്ചു നിന്നു. വഴിപിരിയുമെന്നായപ്പോഴാണ് ഭർത്താവ് പാട്ടിലൂടെ അവളെ തിരിച്ചുപിടിച്ചത്. കേസെടുക്കാനിരുന്ന പൊലിസും വനിതാ ക്ഷേമ വകുപ്പ് ഉദ്യോഗസ്​ഥരും പിന്നെ മധുരം നൽകി ദമ്പതികളെ വീട്ടിലേക്ക് തിരിച്ചയച്ചു. 

2015 ലെ ബോളിവുഡ് ഹിറ്റ് ഗാനമാണ് ‘ബദ്​ലാപുർ’ എന്ന ചിത്രത്തിലെ ‘ദെഹ്​ലീസ്​ പെ മെരെ ദിൽകി’ എന്നു തുടങ്ങുന്ന പ്രണയ ഗാനം. ‘നിന്നെ കൂടാതെ ജീവിക്കാൻ ഞാൻ പഠിച്ചില്ലെ’ന്ന വരികളിലാണ് ഗാനം അവസാനിക്കുന്നത്. ആ വരികൾ അകന്നു പോകുകയായിരുന്ന കുടുംബത്തെ വീണ്ടും ചേർത്തുവെച്ചു.