പൗരത്വപ്പട്ടിക എല്ലാ സംസ്ഥാനങ്ങൾക്കും വേണമെന്ന്​ ആർ.എസ്​.എസ്​ നേതാവ്​

ന്യൂഡൽഹി: പൗരത്വപ്പട്ടിക വിഷയത്തിൽ കുടിയേറ്റക്കാർക്കെല്ലാം പൗരത്വം നൽകാൻ ഇന്ത്യ ധർമശാലയല്ലെന്ന പ്രസ്​താവനയുമായി​ അസം ആർ.എസ്​.എസ്  പ്രചാർ പ്രമുഖ്​ ശങ്കർ ദാസ്​. ഇന്ത്യയുടെ യഥാർത്ഥ പൗരൻമാരെ തിരിച്ചറിയുന്നതിന്​ പൗരത്വപ്പട്ടിക തയാറാക്കണം. സ്വാശ്രയശീലമുള്ള, സ്വാഭിമാനമുള്ള രാജ്യമെന്ന നിലയിൽ ഇന്ത്യയിൽ എല്ലാ സംസ്ഥാനങ്ങളിലും പൗരത്വപ്പട്ടിക തയാറാക്കണം. രാജ്യം നേരിടുന്ന വലിയ പ്രശ്​നമാണിത്​. പൗരത്വപ്പട്ടിക തയറാക്കുന്നത്​ അസമിൽ നിന്നു തന്നെ തുടങ്ങിയത്​ ​ഉചിതമായെന്നും അദ്ദേഹം പറഞ്ഞു. 

വിസ കാലാവധി കഴിഞ്ഞും പലരും ഇന്ത്യയിൽ തന്നെ തുടരുന്ന അവസ്ഥയാണ്​. 1971 ന്​ ശേഷം അസമിൽ ഇൗ പ്രശ്​നം ഗുരുതരമാണ്​. ബംഗാളിൽ നിന്നും അനധികൃതമായി കുടിയേറിയവർ നമ്മുടെ രാജ്യത്തി​​​െൻറ സംസ്​കാരത്തിനും ഭാഷക്കും സത്വത്തിനുമെല്ലാം ഭീഷണിയായി  തുടരുകയാണ്​. പൗരത്വപ്പട്ടിക സംസ്ഥാനത്തിനുള്ളിൽ വിള്ളലുണ്ടാക്കുമെന്ന് പ്രതിപക്ഷ പാർട്ടികൾ ആരോപണമുന്നയിക്കുന്നുണ്ടെന്നും എന്നാൽ അതെല്ലാം വസ്​തുതാവിരുദ്ധമാണെന്നും ശങ്കർ ദാസ്​ പറഞ്ഞു. 
കരട്​ പട്ടികയാണ്​ നിലവിൽ പുറത്തുവന്നിരിക്കുന്നത്​. ഇന്ത്യൻ പൗരൻമാരാണെങ്കിൽ അസമിലുള്ളവർക്ക്​ അത്​ തെളിക്കാനുള്ള അവസരമുണ്ടെന്നും അദ്ദേഹം പറഞ്ഞു.