കർഷക പ്രക്ഷോഭം അടിച്ചമർത്താൻ രണ്ടിടത്ത്​ സ്​ഥാപിച്ചത്​ ഒമ്പതുലക്ഷത്തിന്‍റെ ബാരിക്കേഡുകൾ​

ന്യൂഡൽഹി: ​കർഷകപ്രക്ഷോഭം തടയാൻ ഡൽഹിയിൽ രണ്ടു അതിർത്തികളിൽ മാത്രം പൊലീസ്​ സ്​ഥാപിച്ചത്​ ഒമ്പതുലക്ഷത്തിന്‍റെ ബാരിക്കേഡ്​. രാജ്യതലസ്​ഥാനത്തേക്ക്​ പ്രവേശിപ്പിക്കാതെ കർഷകരെ തടഞ്ഞ ഗാസിപുർ, സിംഘു, ടിക്​രി അതിർത്തികളിലായിരുന്നു ​െപാലീസ്​ വിന്യാസം.

മൂന്നു അതിർത്തികളിൽ കൂറ്റൻ കോൺക്രീറ്റ്​ ബാരിക്കേഡുകൾ സ്​ഥാപിച്ചാണ്​​ കർഷക​രെ പൊലീസ്​ തടഞ്ഞിരുന്നത്​. ടിക്​രി അതിർത്തിയിൽ ബാരിക്കേഡുകൾ സ്​ഥാപിക്കുന്നതിന്​ 7,49,078രൂപ ഇതുവരെ ചിലവഴിച്ചു. ഗാസിപുർ അതിർത്തിയിൽ 1.57 ലക്ഷം രൂപയും. ഡൽഹിയുടെ കിഴക്കൻ ജില്ല അതിർത്തിയാണ്​ ഗാസിപൂർ.

അതേസമയം, വടക്കൻ അതിർത്തിക്ക്​ സമീപത്തെ സിംഘു അതിർത്തിയിൽ ചിലവഴിച്ച തുക വെളിപ്പെടുത്താൻ പൊലീസ്​ തയാറായിട്ടില്ല. പ്രക്ഷോഭം തുടരുന്നതിനാൽ ചിലവുകൾ കണക്കുകൂട്ടാൻ പ്രയാസമാണെന്നായിരുന്നു പ്രതികരണം. ഡൽഹി പൊലീസിൽനിന്ന്​​ ദേശീയ മാധ്യമമായ ഇന്ത്യ ടുഡെക്ക്​ വിവരാവകാശ നിയമപ്രകാരം ലഭിച്ചതാണ്​ ഈ വിവരം.

കർഷക പ്രക്ഷോഭം തുടങ്ങിയതോടെ കനത്ത സുരക്ഷയിലായിരുന്നു ഡൽഹി അതിർത്തികളും പരിസരപ്രദേശങ്ങളും. റിപ്പബ്ലിക്​ ദിനത്തിൽ അക്രമ സംഭവങ്ങൾ അരങ്ങേറിയതോടെ ​പ്രദേശം ഉരുക്കു കോട്ടകളാക്കി മാറ്റിയിരുന്നു. മൂന്നുപാളികളിൽ ബാരിക്കേഡുകളും വരിയായി പൊലീസുകാരും അണിനിരന്ന്​ യുദ്ധ സമാന സാഹചര്യം ഒരുക്കുകയായിരുന്നു ഡൽഹി പൊലീസ്​.

കഴിഞ്ഞവർഷം നവംബർ മുതൽ ഡൽഹി അതിർത്തിയിൽ ​പ്രക്ഷോഭവുമായി കർഷകർ തമ്പടിക്കുകയാണ്​. കേന്ദ്രസർക്കാറിന്‍റെ മൂന്ന്​ കാർഷിക നിയമങ്ങൾ പിൻവലിക്കണമെന്നാണ്​ കർഷകരുടെ ആവശ്യം. കൂടാതെ വിളകൾക്ക്​ അടിസ്​ഥാന താങ്ങുവില ഉറപ്പാക്കണമെന്നുമാണ്​ കർഷകരുടെ ആവശ്യം.