ശബരിമല സ്​ത്രീ പ്രവേശനം: കേസ് വിധി പറയാൻ മാറ്റി

ന്യൂഡൽഹി: എട്ടു ദിവസത്തെ തുടർച്ചയായ വാദം കേൾക്കലിനൊടുവിൽ ശബരിമലയിൽ സ്​ത്രീകൾക്കുള്ള വിലക്ക്​ എടുത്തുകളയണമെന്ന്​ ആവശ്യപ്പെടുന്ന ഹരജി സുപ്രീംകോടതി ഭരണഘടനാ ബെഞ്ച്​ വിധി പറയാനായി മാറ്റിവെച്ചു. ദൂരവ്യാപക പ്രത്യാഘാതങ്ങളുണ്ടാക്കിയേക്കാവുന്ന വിധി ചീഫ്​ ജസ്​റ്റിസ്​ ദീപക്​ മിശ്ര, ജസ്​റ്റിസുമാരായ രോഹിങ്​​ടൺ നരിമാൻ, എം.എം. ഖൻവിൽകർ, ഡി.വൈ ചന്ദ്രചൂഡ്​, ഇന്ദ​ു മൽഹോത്ര എന്നിവരടങ്ങുന്ന അഞ്ചംഗ ബെഞ്ച്​ പുറപ്പെടുവിക്കും. 

ഭരണഘടനയുടെ 15ാം അനുഛേദം ആരാധനാസ്​ഥലങ്ങളിലേക്കുള്ള സ്വാതന്ത്ര്യം പരാമർശിക്കാത്തതിനാൽ ശബരിമലയി​ൽ സ്​ത്രീകൾക്കുള്ള വിലക്ക്​ അതിനെതിരാണെന്ന്​ എങ്ങനെ പറയാനാകുമെന്ന്​ സുപ്രീംകോടതി അവസാന ദിവസം ആരാഞ്ഞു. കേസിൽ ഭരണഘടനയുടെ 13ഉം 14ഉം അനുഛേദങ്ങളുടെ പ്രസക്​തിയും സുപ്രീംകോടതി ചോദിച്ചു. സ്​ത്രീപ്രവേശനത്തിനായി ഇതുവരെ നടത്തിയിരുന്ന കർക്കശമായ നിരീക്ഷണങ്ങളിൽനിന്ന്​ ഭിന്നമായി അൽപം മയത്തിലാണ്​ ബുധനാഴ്​ച സുപ്രീംകോടതി വിഷയത്തെ സമീപിച്ചത്​. 

ശബരിമലയിൽ സ്​ത്രീകൾക്കുള്ള വിലക്ക്​, വിശ്വാസവുമായി  മാത്രം ബന്ധപ്പെട്ട വിഷയമാണെന്നും ക്ഷേത്രത്തിലെ മതേതര വിഷയങ്ങളിൽ ഭരണകൂടത്തിന്​ ഇടപെടാമെങ്കിലും മതവിഷയത്തിൽ ഇടപെടാനാകില്ലെന്നും സുപ്രീംകോടതി അമിക്കസ്​ ക്യൂറിമാരി​െലാരാളായ കെ.ആർ. രാമമൂർത്തി ബോധിപ്പിച്ചു. ശബരിമല വിഷയത്തിൽ രാഷ്​ട്രീയ സ്വാധീനം മൂലമാണ്​ കേരള സർക്കാർ നിലപാട്​ മാറ്റിയതെന്ന്​ മൂർത്തി കുറ്റപ്പെടുത്തി. കേരള സർക്കാർ തന്നെയാണ്​ കേരള ഹിന്ദു ആരാധനാലയ ​പ്രവേശന ചട്ടം ഉണ്ടാക്കിയതെന്നും രാമമൂർത്തി വാദിച്ചു. 

ദേശീയഗാനം ആലപിക്കാത്തതിന്​ യഹോവാസാക്ഷികളായ കേരളത്തിലെ മൂന്നു​ കുട്ടികളെ സ്​കൂളിൽ നിന്ന്​ പുറത്താക്കിയതിനെതിരെ സമർപ്പിച്ച ഹരജിയിൽ 1986ൽ സുപ്രീം​േകാടതി പുറപ്പെടുവിച്ച വിധി അമിക്കസ്​ ക്യൂറി ശബരിമലയിൽ സ്​ത്രീ വിലക്കിനെ ബല​െപ്പടുത്തുന്ന വിധിയായി ഉദ്ധരിച്ചു. ദേശീയഗാനം തങ്ങളുടെ മതവിശ്വാസത്തിന്​ വിരുദ്ധമായതിനാൽ ആലപിക്കാത്ത കുട്ടികളുടെ നടപടി സുപ്രീംകോടതി ശരിവെച്ചിരുന്നു. 

ശബരിമലയിലെ സ​മ്പ്രദായവും ഭരണഘടനാപരമായിരിക്കണമെന്ന്​ ഇന്ദിരാ ജയ്​സിങ്​​ വാദിച്ചു. അടിസ്​ഥാന മതാചാരങ്ങൾ എന്താണെന്ന്​ തീരുമാനിക്കാനുള്ള അധികാരം സുപ്രീംകോടതിക്കുണ്ടെന്നും അവർ ഒാർമിപ്പിച്ചു.