അഭ്യൂഹങ്ങൾക്കിടെ സചിൻ പൈലറ്റ്​ ഡൽഹിയിൽ; കോൺഗ്രസ്​ നേതൃത്വത്തെ കാണും

ന്യൂഡൽഹി: ബി.ജെ.പിയിലേക്കെന്ന അഭ്യൂഹങ്ങൾ പരക്കുന്നതിനിടെ സചിൻ പൈലറ്റ്​ ഡൽഹിയിൽ. കോൺഗ്രസ്​ നേതൃത്വവുമായി കൂടിക്കാഴ്ച നടത്തുമെന്നാണ്​ വിവരം. രാജസ്ഥാൻ മുഖ്യമന്ത്രി അശോക്​ ഗെഹ്​ലോട്ടുമായി ഉടലെടു​ത്ത അഭിപ്രായഭിന്നതയിൽ നേതൃത്വം മുന്നോട്ടുവെച്ച വാഗ്​ദാനങ്ങൾ പാലിക്കാത്തതിനെ തുടർന്നാണ്​ കൂടിക്കാഴ്ചയെന്ന്​ അദ്ദേഹം പറഞ്ഞിരുന്നു.

രണ്ടുദിവസം മുമ്പ്​ ഉത്തർപ്രദേശ്​ കോൺഗ്രസിന്‍റെ ന​ട്ടെല്ലായിരുന്ന ജിതിൻ പ്രസാദ ബി.ജെ.പിയിലേക്ക്​ ചേക്കേറിയതിന്​ പിന്നാലെയുള്ള സചിൻ പൈലറ്റിന്‍റെ നീക്കങ്ങൾ കോൺഗ്രസിനുള്ളിൽ റെഡ്​ അലർട്ട്​ പ്രഖ്യാപിക്കാൻ കാരണമായിട്ടുണ്ട്​.

വെള്ളിയാഴ്​ച വൈകിട്ടാണ്​ സചിൻ പൈലറ്റ്​ ഡൽഹിയിലെത്തിയത്​. സചിൻ പൈലറ്റ്​ കോൺഗ്രസ്​ വിടുമെന്ന്​ സൂചിപ്പിച്ച്​ ബി.ജെ.പി നേതാവ്​ റീത്ത ബഹുഗുണ ജോഷി രംഗത്തെത്തിയിരുന്നു. സചിനുമായി സംസാരിച്ചെന്നും അദ്ദേഹം ഉടൻ ബി.ജെ.പിയിലെത്തുമെന്നുമായിരുന്നു റീത്തയുടെ വാദം.

എന്നാൽ, ഇതിനെതിരെ രൂക്ഷ പ്രതികരണവുമായി സചിൻ പൈലറ്റ്​ രംഗത്തെത്തിയിരുന്നു. സചിനുമായി സംസാരിച്ചെന്ന്​ റീത്ത ബഹുഗുണ ജോഷി പറഞ്ഞു. അവർ സചിൻ ടെണ്ടുൽക്കറോടായിരിക്കും സംസാരിച്ചിട്ടുണ്ടാകുക. എ​ന്നോട്​ സംസാരിക്കാനുള്ള ധൈര്യം അവർക്കില്ലെന്നും സചിൻ പൈലറ്റ്​ പറഞ്ഞു.

കഴിഞ്ഞവർഷം ജ്യോതിരാദിത്യ സിന്ധ്യ കോൺഗ്രസ്​ വിട്ട്​ ബി.ജെ.പിയിലെത്തിയതോടെയാണ്​ ജിതിൻ പ്രസാദയും സചിൻ പൈലറ്റും റഡാറിനുള്ളിലായത്​. ജിതിൻ പ്രസാദ കൂടി പാർട്ടി വിട്ടതോടെ സചിൻ പൈലറ്റിലേക്കായി എല്ലാ കണ്ണുകളും. താൻ ഒരിക്കലും ബി.ജെ.പിയിൽ ചേരില്ലെന്നും അവരുടെ പശു രാഷ്​ട്രീയത്തോട്​ ​േ​യാജിക്കില്ലെന്നും സചിൻ പൈലറ്റ്​ വ്യക്തമാക്കിയിരുന്നു. കോൺഗ്രസിനുള്ളിൽ നിന്നുതന്നെ​ തന്‍റെ പങ്ക്​ ചോദിച്ചുവാങ്ങുമെന്നും പരിഷ്​കാരങ്ങൾക്കായി പ്രവർത്തിക്കുമെന്നുമായിരുന്നു സചിന്‍റെ പ്രതികരണം.

കഴ​ിഞ്ഞവർഷം അശോക്​ ഗെഹ്​ലോട്ടുമായി കൊമ്പുകോർത്ത സചിൻ പൈലറ്റ്​ കോൺഗ്രസ്​ നേതൃത്വം നൽകിയ വാഗ്​ദാനങ്ങളെ തുടർന്ന്​ യുദ്ധം അവസാനിപ്പിക്കുകയായിരുന്നു.